“Qasoskorlar”, “O‘rgimchak odam”, “Xalk” va “Fantastik to‘rtlik” muallifi, 2018-yilda vafot etgan Sten Li Marvel kinoolamida yana paydo bo‘ladi. Hayotligida u superqahramonlar haqidagi filmlarni suratga olishda bir necha bor ishtirok etgandi, deb xabar beradi The Hollywood Reporter.
Ma’lumotlarga ko‘ra, Marvel POW! Entertainment va Genius Brands International kabi kompaniyalar bilan shartnoma imzolagan. Shartnoma Sten Li ismi va obrazidan 20 yil davomida foydalanish uchun litsenziyani beradi. Marvel bunda barcha turdagi tijoriy dasturlardan foydalanadi: Stenning ko‘rinishidan foydalanilgan filmlardan tortib, reklama bannerlarigacha.
Oxirgi marotaba Sten Li obrazidan 2019-yilda “Qasoskorlar: Intiho” kartinasida foydalanilgandi. Marvel rahbari ishtirokidagi epizodlarni qo‘shishga kompyuter grafikasi va CGI texnologiyasi yordam bergan. Genius Brands kompaniyasining qo‘shimcha qilishicha, hozirda mavjud videoyozuvlar va arxiv tasvirlar Lining obrazini aniq yaratishga yetarli. Shuningdek, ta’kidlanishicha, Stenning yuzidan Disney’ning tematik bog‘larida ham foydalaniladi.
CGI texnologiyasi ikki o‘lchamli tasvirdan sifatli 3D-model yaratish imkonini beradi. Suratga olish vaqtida aktyorga maxsus apparatlar kiydirilib, uning mimikasi va harakatlari yozib olinadi. Ya’ni Sten Lini boshqa inson o‘ynaydi, qayta ishlash jarayonida yuzi Stennikiga o‘zgartiriladi. CGI texnologiyasidan “Xobbit” va “Avatar” kabi kartinalarda foydalanilgan.
Izoh (0)