Eronning turli shaharlarida oziq-ovqat narxi oshib ketgani va ba’zi mahsulotlar tanqisligi tufayli norozilik namoyishlari davom etmoqda, deb xabar beradi Anadolu agentligi.
Foto: Anadolu Agency
Eronda hukumat tomonidan subsidiyalar bekor qilinganidan keyin asosiy oziq-ovqat mahsulotlari qimmatlashganiga qarshi noroziliklar mamlakatning turli viloyatlarini qamrab oldi.
Norozilik aksiyalari Luriston viloyatining Burujard va Durud, Chahormahol va Baxtiyoriy viloyatining Junkan va Farson, Ko‘hgiluya va Buyir-Ahmad viloyatining Dahdasht shaharlarida bo‘lib o‘tdi.
Ijtimoiy tarmoqlarga joylangan kadrlarda Burusard va Farson shaharlarida mamlakat hukumatiga qarshi shiorlarni baralla aytayotgan namoyishchilarga qarshi xavfsizlik kuchlari ko‘zni yoshlantiruvchi gazdan foydalangani va o‘t ochganini ko‘rish mumkin.
Ichki ishlar vaziri Ahmad Vohidiy davlat televideniyesida nutq so‘zlayotib, namoyishlar keng ko‘lamli bo‘lmaganini ma’lum qildi: “Bizning odamlarimiz dushmanlar chaqirig‘iga javob qilmadi. Bir necha o‘nlab kishilar to‘plandi, xolos”.
Eronning IRNA davlat agentligi xabariga ko‘ra, mamlakatda yiliga subsidiya ko‘rinishida jami 900 trillion tuman (taxminan 30 milliard dollar) pul to‘lanadi.
Eron prezidenti Ibrohim Raisiy 9-may kuni iqtisodiy inqirozga qarshi kurash doirasida eng zarur mahsulotlarga subsidiyalar to‘xtatilishini e’lon qildi. Natijada mamlakatda narxlar oshishi kuzatildi.
O‘z bayonotida Raisiy an’anaviy Eron noni, dori va benzin narxlari o‘zgarmasligini ma’lum qildi. Shunga qaramay, mahalliy matbuotda non narxi 3 barobargacha oshgani haqida xabarlar paydo bo‘ldi. Yog‘, tuxum va tovuq go‘shti qariyb to‘rt barobar qimmatlashgan bo‘lsa, ba’zi mahsulotlar umuman tanqis bo‘lib qoldi.
Asosiy mahsulotlar narxi o‘sishi tufayli aholisi asosan arablar bo‘lgan Xuziston viloyatining Dizfol, Ondimashk, Izi shaharlarida, shuningdek, Ko‘hgiluya va Buyir-Ahmad viloyatining Yasuk shahrida namoyishlar avj oldi.
IRNA ma’lumotlariga ko‘ra, o‘tgan tunda Dizfo‘l shahridagi namoyishlarga rahbarlik qilgan 15 kishi hamda Yasuk shahrida “jamoat mulkiga zarar yetkazish maqsadida namoyishchilarni manipulyatsiya qilishga uringan” 7 kishi hibsga olingan.
Namoyishlar bo‘lib o‘tgan shaharlarda internetdan foydalanish cheklangan. Londonning internetdan global foydalanishni kuzatib boruvchi Netblock veb-sayti Eronda internet-xizmatlari cheklanganini tasdiqladi.
