Toshkentning Chorsu bozoridagi uchta gumbazlardan biri buzib tashlanishi mumkin

Toshkentdagi Chorsu bozorida amalga oshirilayotgan qurilish ishlari natijasida uchta gumbazdan biri buzib tashlanishi mumkin. Bu haqda Instagram’dagi Tashkent Modernism kanali xabar berdi.

Ma’lum qilinishicha, bozor hududida bunyod etiladigan Chorsu Gold Center loyihasida uchinchi gumbazni saqlab qolish ko‘zda tutilmagan.

Bozordagi quruvchilar ushbu ma’lumotni “Anhor.uz” nashriga tasdiqlagan bo‘lib, ular maket bo‘yicha qurilish ishlarini olib borayotganliklarini ma’lum qilgan. O‘z navbatida maketda uchinchi gumbaz ko‘rsatilmagan.

Eslatib o‘tamiz, fevral o‘rtalarida Toshkent shahridagi “Koinot” (Kosmonavtlar) majmuasida Vladimir Janibekov haykali atrofidagi granit plitalar ko‘chirib tashlangani haqida xabar tarqalgandi. Shundan so‘ng Madaniy meros agentligi hududning demontaj ishlari ruxsatsiz boshlanganini aniqlagan edi. Agentlik tomonidan maydonni rekonstruksiya qilayotgan Mimar Group kompaniyasi ogohlantirildi va jarayon to‘xtatildi. 15-fevral kuni esa Kosmonavtlar maydonini obodonlashtirish loyihasi ilmiy-ekspert kengashida ma’qullangandi.