Sardor Rahimxon “Yurak amri” xayriya fondi faoliyati vaqtincha to‘xtatilganini ma’lum qildi

“Yurak amri” xayriya va jamoat fondi faoliyati vaqtincha to‘xtatiladi. Bu haqda fond rahbari Sardor Rahimxon ijtimoiy tarmoqdagi sahifasida ma’lum qildi.

Azizlar, aziz yurtdoshlar, bugun sizlarga “Yurak amri” nomidan rasmiy e’lon bilan murojaat qilmoqchiman.

2 yillik faoliyatimiz davomida minglab insonlarning xonadonlariga xursandchilik olib kirilishiga Alloh sababchi qildi. Uylar topshirildi, kasallar tuzaldi, qarzlar uzildi, yetimlar qalbiga xursandchilik kirdi.

Ammo tan olish kerak, shaxsan men o‘zim ham, jamoamiz ham bunday katta ko‘lamga tayyor emasdik. Tayyor emas ekanmiz. Ayniqsa, minglab insonlarning omonatlari, ehsonlari haqida gap ketganda, bizning ham jismoniy, ham ruhiy imkoniyatlarimiz yetishmasligini his qildik. Shu sabab katta xatolarning oldini olish maqsadida, yurtimiz, aziz xalqimiz, yurtboshimiz oldida yuzimiz yorug‘ bo‘lsin degan maqsadda vaqtinchalik faoliyatimizni to‘xtatishga qaror qildik. Ya’ni, yanada kuchga to‘lish, xatolarimizni isloh qilish, rasmiy faoliyatga tayyorgarlik ko‘rish maqsadida mana shunday qarorga keldik. Ammo biling, bu vidolashish emas, biz sizlardan ozgina tanaffus so‘ramoqdamiz.

Yurak amriga atagan mehr-muhabbatingizni, omonatlaringizni, ehsonlaringizni faoliyati davom etayotgan hayriya fondlar, jumladan, “Mehrli qo‘llar”, “Vaqf” fondlariga o‘tkazishingizni iltimos qilardim. Chunki hammamizning maqsadimiz bir, yo‘limiz bir — mana shu yurtning koriga yarash.

Alohida iltimosim bor, gaplarimni yurakdan qabul qiling, boshqa ma’no yasamang. Biz sizlardan ozgina tanaffus so‘rayapmiz, ertangi yaxshi natijalar uchun. Biz O‘zbekistonni yaxshi ko‘ramiz”, — deya yozgan Sardor Rahimxon.