Andijon viloyati Asaka tumanida 19-aprel kuni yo‘l transport hodisasi oqibatida Rossiya fuqarosi halok bo‘ldi. Bu haqda “Millar” informatsion dasturida xabar qilindi.
Qayd etilishicha, holat 19-aprel kuni soat 23:00 atrofida Andijon viloyati Asaka tumani Sho‘rqishloq hududidan o‘tuvchi xalqaro ahamiyatga ega, sun’iy yoritilmagan A-373 avtomobil yo‘lining 416-kilometrida sodir bo‘lgan. Rossiya fuqarosi Nexia-2 avtomashinasida viloyat bo‘ylab yuqori tezlikda tranzit o‘tib ketayotib, rulda uxlab qolgan. Qarama-qarshi yo‘nalishga chiqib ketib, boshqa avtomobil bilan to‘qnashib ketgan.
YTH oqibatida Rossiya fuqarosi olgan tan jarohatlari bilan kasalxonaga yotqizilgan. Ko‘rsatilgan muolajalarga qaramay vafot etgan.
Shuningdek, Andijonda 19-aprel kuni 20 yoshli talabani uyqu bosishi sababli beshta avtomobil ishtirokida YTH sodir bo‘lgan. Oqibatda Damas avtomashinasining 23 yoshli haydovchisi son sinishi tufayli shifoxonaga yotqizilgan.
Hozirda har ikkala holat yuzasidan surishtiruv ishlari olib borilmoqda.
Bundan avval Jizzaxda Nexia bilan to‘qnashgan Lacetti’da qisilib qolgan erkak qutqarilgani, Nexia haydovchisi vafot etib, uch yo‘lovchi tan jarohati olgani haqida xabar berilgandi. Bundan tashqari, Toshkentda daraxtga urilgan BMW ag‘darilgani, Jizzaxda maktab o‘quvchilarini olib ketayotgan avtobuslar to‘qnashgani xabar qilingan.
Izoh (0)