“Barselona”ning Spotify striming servisi bilan hamkorligi ratifikatsiya qilindi.
Katalon klubining navbatdan tashqari assambleyasida delegatlarning 89 foizi kelishuvni yoqlab ovoz berdi va shartnoma tasdiqlandi.
Spotify logotipi 2022/23-yilgi mavsumdan boshlab to‘rt yil davomida “Barselona”ning erkaklar va ayollar jamoalarining libosida bo‘ladi. Xuddi shunday kelishuv uch mavsum davomida mashg‘ulot liboslari uchun ham amalda bo‘ladi.
Uzoq yillik bitim “Kamp Nou” nomining sotib olinishi bilan bog‘liq. 2022-yilning iyulidan boshlab stadion nomida Spotify atamasi paydo bo‘ladi va 12 mavsum davomida amalda bo‘ladi.
Diario Sport’ga ko‘ra, “Barselona” 12 yillik ushbu kelishuvdan kamida 435 million yevro daromad topadi.
Eslatib o‘tamiz, ayni vaqtda “Barselona” bosh jamoasining titul homiysi Rakuten kompaniyasi hisoblanadi, mashg‘ulot liboslarida esa Beko logotipi aks etgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!