Litva Yevropa Ittifoqi mamlakatlari orasida birinchi bo‘lib Rossiya gazidan to‘liq voz kechdi. Bu haqda mamlakat Energetika vazirligiga tayanib, Delfi xabar berdi.
Vazirlikning qayd etishicha, Litva gaz transporti tizimi 1-apreldan boshlab Rossiya gazini import qilmayapti. Litvada barcha ehtiyojlar Klaypeda suyultirilgan tabiiy gaz terminali hisobidan qondiriladi.
“Bu uzoq muddatli izchil energetika siyosati va infratuzilma bo‘yicha o‘z vaqtida qabul qilingan qarorlar natijasidir”, — deya izoh berdi energetika vaziri Daynyus Kreyvis.
Ukrainada urush boshlanganidan keyin Yevropada Rossiya gazidan voz kechish faol muhokama qilina boshladi. Mart oyi oxirida “Katta yettilik” davlatlari Rossiya energetika resurslarini sotib olishni to‘xtatishga tayyorligini e’lon qildi hamda gaz va neft ishlab chiqaruvchi boshqa davlatlarni “mas’uliyat bilan harakat qilish va xalqaro bozorlarga yetkazib berish hajmini oshirish”ga chaqirdi. G7 shuningdek, Rossiya yonilg‘isiga qaramlikni kamaytirishni istagan boshqa mamlakatlarni ham qo‘llab-quvvatlashini bildirdi.
Umuman olganda, Yevropa tabiiy gazning 40 foizdan ortig‘ini Rossiyadan oladi. Germaniya boshqa mamlakatlarga qaraganda Rossiya gaziga ko‘proq qaram bo‘lib, mamlakat ehtiyojlarining 50 foizini Rossiya yonilg‘isi qondiradi.
Mavzuga doir:
Izoh (0)