“O‘zgidromet” dam olish kunlari qanday ob-havo bo‘lishini ma’lum qildi

Dam olish kunlari respublika hududining katta qismida iliq va quruq ob-havo bo‘lishi kutilmoqda, deb xabar beradi “O‘zgidromet”.

Qayd etilishicha, mart oyining oxirgi kunlari boshlangan Erondan iliq havo kirib kelishi aprel oyining birinchi haftasida ham davom etadi.

1-aprel, juma kuni kunduz kuni va dam olish kunlari O‘zbekiston hududi bo‘yicha asosan quruq va juda iliq ob-havo bo‘lishi kutilmoqda. Kunduz kunlari havo 20-24 darajagacha, ba’zi joylarda 25-28 darajagacha isiydi. Bu aprel oyi boshidagi ko‘p yillik qiymatlardan 4-6 darajaga yuqoridir.

Respublika hududining katta qismida ushbu kunlarda asosan kam bulutli va quruq ob-havo bo‘lishi kutilmoqda.

Faqat Toshkent, Samarqand, Jizzax viloyatlarida, shuningdek, respublikaning tog‘ oldi va tog‘li hududlarida 2-aprel, shanba kuni havo bulutli bo‘ladi, kunning ikkinchi yarmida ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin.