Toshkent viloyatida 19 yoshli yigitning transformator toki urishi oqibatida vafot etishiga sababchi bo‘lgan mas’ul shaxsga besh yil muddatga ozodlikdan cheklash jazosi tayinlandi. Bu haqda Bosh prokuratura matbuot xizmati rahbari Hayot Shamsutdinov “Daryo”ga xabar berdi.
Toshkent viloyatining Toshkent tumanida 2021-yilning may oyida 19 yoshli yigit transformator toki urishi oqibatida vafot etgani to‘g‘risida xabar berilgandi. Holat bo‘yicha Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan.
Jinoyat ishi hujjatlariga ko‘ra, 1984-yilda Toshkent tumanida tug‘ilgan S.S. Toshkent tumani “Elektr ta’minoti” korxonasi “Keles” ustachilik bo‘limi katta ustasi lavozimida ishlab kelib, egallab turgan lavozimiga ko‘ra mansabdor shaxs bo‘la turib, “Chuvalachi” mahalla raisi va fuqarolari tomonidan Toshkent tumani, “Chuvalachi” hududi, Gulyashnar ko‘chasida joylashgan transformatorga temir panjara ulanganligi va undan tok chiqayotganligi to‘g‘risida bir necha marotaba og‘zaki xabar berilgan bo‘lsa-da, ushbu og‘zaki xabarlarni tekshirmasdan nazoratsiz qoldirgan.
S.S. o‘ziga yuklatilgan vazifalarga loqaydlik bilan qarab, ularni lozim darajada bajarmaganligi oqibatida 2021-yil 6-may kuni 2002-yilda tug‘ilgan X.T. transformatorga ulangan temir panjarani ushlagan vaqtida temir panjaradan chiqqan tok urib, hodisa joyida vafot etgan.
“O‘zenergoinspeksiya” xulosasiga ko‘ra, “Keles” ustachilik bo‘limi ustasi S.S. tomonidan belgilangan qoida talablarini bajarishda mas’uliyatsizlikka yo‘l qo‘yganligi aniqlangan.
Holat Jinoyat ishlari bo‘yicha Toshkent tumani sudida 2021-yilning avgust oyida ko‘rib chiqilib, ayblanuvchi S.S. Jinoyat kodeksining 257-moddasi 2-qismi “a” bandi (mehnatni muhofaza qilish qoidalarini buzish odam o‘lishiga sabab bo‘lsa) bilan aybli deb topilgan. Hukmga ko‘ra, unga nisbatan besh yil muddatda ozodlikni cheklash jazosi tayinlangan. Shuningdek, ikki yil mehnatni muhofaza qilish faoliyati bilan bog‘liq lavozimlarda ishlash huquqidan mahrum qilingan.
Bundan avval Toshkentda poyezd ustida selfi qilmoqchi bo‘lgan 18 yoshli yigitni 27 ming voltli tok urgani hamda Toshkentda 8 yoshli qizaloq elektr toki urishi oqibatida vafot etgani haqida xabar berilgandi.
Izoh (0)