Qashqadaryoda 2021-yilda poraxo‘rlik bilan bog‘liq 109 ta jinoyat sodir etilgan

Qashqadaryo viloyatida 2021-yil poraxo‘rlik jinoyati 2020-yilga nisbatan 41 taga ko‘paygani ma’lum qilindi. Bu haqda Qarshi shahridagi Jurnalistlar uyida viloyat sudi raisi va o‘rinbosarlari ishtirokida bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.

Qayd etilishicha, 2020-yilda poraxo‘rlik jinoyati 68 tani tashkil qilgan bo‘lsa, 2021-yilda bu ko‘rsatkich 109 taga yetgan.

“To‘g‘ri, 2021-yilda nomusga tegish, valyuta ayriboshlash, noqonuniy chetga chiqish, avtomobilni olib qochish kabi jinoyatlar kamaygan bo‘lsa-da, ayrim jinoyatlar tumanlar kesimida ko‘payganini ko‘rishimiz mumkin. Masalan, qasddan badanga og‘ir va o‘rtacha og‘ir shikast yetkazish 188 tadan 355 taga, ya’ni 167 taga ko‘paygan. Bosqinchilik 4 taga, talonchilik 36 taga, o‘zlashtirish va rastrata yo‘li bilan talon-taroj qilish 256 taga, o‘g‘rilik 70 taga, poraxo‘rlik 41 taga, harakat xavfsizligini qoidalarini buzish esa 109 taga, bezorilik 38 taga ko‘payganini ko‘rishimiz mumkin”, — deydi viloyat sudi raisi Abdiqayum Mahkamov.

Qo‘shimcha qilinishicha, viloyatda qasddan odam o‘ldirish jinoyati ham oshgan.

Abduqayum Mahkamov avvalroq sudyalarga 2016-yilga qadar bosim o‘tkazish holati ro‘y berganini, Prezident Shavkat Mirziyoyevning prezidentlikka kelishi va odil sudlov tizimini shakllantirish borasida amalga oshirilgan ishlar bois bu kabi holatlarga chek qo‘yilganini bildirgandi.