26-yanvar kuni Gretsiya poytaxti Afina markazidagi turar joy binosida portlash va yong‘in sodir bo‘ldi. Oqibatda bir qancha binolar zarar ko‘rdi, bir kishi jarohat oldi, deb yozadi Athens 24.

Foto: Twitter

O‘t o‘chirish bo‘limi ma’lumotlariga ko‘ra, portlashga katta ehtimol bilan gazning sizib chiqishi sabab bo‘lgan. Ma’lum qilinishicha, uyning bir qismida aholi yashamagan.

Yong‘in tezda o‘chirilgan. Portlash zarbasi birinchi qavatdagi oziq-ovqat do‘koni joylashgan butun binoga, shuningdek, ro‘paradagi binoga jiddiy zarar yetkazgan.

200 metr masofada joylashgan uylarning oynalari singan, ikkita mashina shikastlangan. 78 yoshli erkak tan jarohati olib, kasalxonaga yotqizilgan. Portlash sodir bo‘lgan joyga Gretsiya politsiyasining portlovchi moddalarni zararsizlantirish guruhi yetib kelgan.

Avvalroq Ganada sodir bo‘lgan kuchli portlash oqibatida 500 dan ortiq bino vayron bo‘lgandi. Fojia oqibatida kamida 17 kishi halok bo‘lgan.

Shuningdek, Afg‘oniston sharqida yuz bergan portlashda 9 nafar maktab o‘quvchisi halok bo‘lgani, Nyu-Yorkda gaz portlashi oqibatida ko‘p qavatli uyning bir qismi qulab tushgani, Gaitida yonilg‘i ortilgan avtosisterna avariyaga uchrab, portlashi oqibatda 40 dan ortiq odam halok bo‘lgani to‘g‘risida xabarlar berilgandi.