Shavkat Mirziyoyev Ozarbayjon prezidentini 60 yillik yubileyi bilan tabrikladi
Shavkat Mirziyoyev 24-dekabr kuni Ozarbayjon prezidenti Ilhom Aliyev bilan telefon orqali muloqot qildi.
Prezident matbuot xizmatining xabar berishicha, davlat rahbari Ilhom Aliyevni 60 yillik yubileyi bilan samimiy tabriklab, unga mustahkam sog‘lik, farovonlik va katta muvaffaqiyatlar, Ozarbayjon xalqiga esa tinchlik-osoyishtalik va ravnaq tiladi.
Suhbat davomida O‘zbekiston—Ozarbayjon strategik sheriklik va ko‘p qirrali hamkorlik munosabatlari kun tartibidagi dolzarb masalalar ko‘rib chiqilgan. Davlat rahbarlari ustuvor tarmoq va yo‘nalishlarda, shu jumladan, mashinasozlik, energetika, qishloq xo‘jaligi, transport va logistika sohalarida amaliy hamkorlik bo‘yicha loyihalarni jadal ilgari surish muhim ekanini qayd etgan.
Mintaqaviy siyosat hamda xalqaro tashkilotlar doirasidagi hamkorlik masalalari yuzasidan ham fikr almashilgan. Bo‘lajak tadbirlar rejasi ko‘rib chiqilgan.
Eslatib o‘tamiz, Shavkat Mirziyoyev so‘nggi marta Ozarbayjon prezidenti bilan 5-noyabr kuni telefon orqali muloqot qilib, Ozarbayjon prezidenti va xalqini G‘alaba kuni bilan tabriklagandi.
