O‘zbekistonda Yangi yil oldidan “Afrosiyob” poyezdlarida qo‘shimcha qatnov yo‘lga qo‘yiladi

Yangi yil bayrami arafasida yo‘lovchilarga qulaylik yaratish maqsadida 2021-yil 27-dekabrdan 2022-yil 9-yanvargacha Toshkent—Buxoro—Toshkent yo‘nalishida 770/769-sonli “Afrosiyob” poyezdlarining qatnovini yo‘lga qo‘yiladi. Bu haqda “O‘zbekiston temir yo‘llari” xabar berdi.

Ma’lum qilinishicha, 770-sonli “Afrosiyob” faqat haftaning juma, shanba va yakshanba kunlari soat 09:02 da Toshkent markaziy temiryo‘l vokzalidan harakatini amalga oshirib kelayotgan edi. Endi poyezd 27-dekabrdan 9-yanvargacha har kuni soat 09:02 da Toshkent—Buxoro yo‘nalishida qatnovini amalga oshiradi.

Shuningdek, 769-sonli “Afrosiyob” poyezdi ham 27-dekabrdan 9-yanvargacha har kuni soat 15:02 da Buxoro—Toshkent yo‘nalishida qatnovini amalga oshiradi.

Poyezdlar Samarqand, Navoiy temiryo‘l vokzallarida ham to‘xtab o‘tadi.

Bundan tashqari, bayram kunlari barcha yo‘lovchi poyezdlarga qo‘shimcha vagonlar ham ulanadi.