Putin koronavirusga qarshi qayta emlangani va burunga purkaladigan vaksinani ham sinab ko‘rganini ma’lum qildi

Rossiya prezidenti Vladimir Putin koronavirusga qarshi qayta emlanish doirasida “Sputnik V” vaksinasining burunga purkaladigan shaklini sinab ko‘rganini ma’lum qildi, deb yozadi Meduza.

Rossiya prezidentining so‘zlariga ko‘ra, u avvaliga “Sputnik Layt” bilan qayta emlangan, ertasi kuni kukun ko‘rinishidagi burunga purkaladigan preparatni ham sinab ko‘rgan. Emlash jarayonini Gamaleya instituti direktorining o‘rinbosari Denis Logunov olib borgan.

“Ya’ni bu qanday (vaksina). Bu ham oddiy shpritsda. Faqat suyuq modda o‘rniga u (Logunov) kukunni tortdi. U mendan uchgacha sanashda chuqur nafas olishimni so‘radi va avval birinchi, keyin ikkinchi tomonga (preparatni) purkadi. Keyin 15 daqiqa o‘tirdim, shu bilan jarayon tugadi”, — dedi u

Putinning aniqlik kiritishicha, emlashdan keyin u hech qanday salbiy ta’sir sezmagan va 24-noyabr kuni bemalol sport bilan shug‘ullangan.

Vladimir Putin 23-mart kuni koronavirusga qarshi vaksinaning birinchi dozasi bilan emlangandi. Putin omma oldida emlanishdan bosh tortgan. 14-aprel kuni esa Putin vaksinaning ikkinchi dozasini qabul qilgan. Uning qaysi vaksina bilan emlangani noma’lum edi. Kreml bu ma’lumotni oshkor qilishdan bosh tortgandi. Keyinroq to‘g‘ridan to‘g‘ri efirdagi xalq bilan muloqot chog‘ida prezidentning o‘zi “Sputnik V” bilan emlanganini ma’lum qilgan.

21-noyabr kuni Logunov bilan uchrashuvda Putin “Sputnik Layt” orqali koronavirusga qarshi qayta emlanganini ma’lum qildi. Shuningdek, u “Sputnik V” vaksinasining burunga purkaydigan shaklini sinovdan o‘tkazishda ishtirok etish istagida ekanini bildirgan.

Sentabr oxirida AQSh prezidenti Jo Bayden koronavirusga qarshi vaksinaning uchinchi — buster dozasini olgani xabar qilingandi.