Pokiston Vazirlar Mahkamasi Hindistonning qo‘shni Afg‘onistonga oziq-ovqat yordamini yetkazib berishda Pokiston hududidan o‘tgan quruqlik yo‘lidan foydalanishiga ruxsat berdi.
Pokiston bosh vaziri Xonning idorasida ma’lum qilinishicha, Islomobod Kobulga 28,65 million dollarlik insonparvarlik yordami, jumladan, Hindiston jo‘natgan 50 ming tonna bug‘doyni o‘z ichiga olgan oziq-ovqat mahsulotlari, asosiy ehtiyojlar uchun zarur va tibbiy buyumlar, qishki boshpana va boshqa materiallarni yuboradi.
“Biz Hindiston Afg‘onistonga jo‘natmoqchi bo‘lgan ushbu 50 ming tonna bug‘doyni o‘tkazib yuborishni ma’qulladik. Biz har qanday insonparvarlik yordami Afg‘oniston xalqiga yetkazilishi kerak, deb hisoblaymiz”, — dedi Pokiston axborot vaziri Favad Chaudri Vazirlar Mahkamasi yig‘ilishidan keyingi matbuot anjumanida.
Shuningdek, bayonotda aytilishicha, Pokiston Hindistonga davolanish uchun yuborilgan afg‘onistonlik bemorlarning ortga qaytishiga yordam beradi.
Ma’lumot uchun, Pokiston ko‘p yillar davomida Hindistonning Afg‘oniston bilan tijoriy yoki boshqa transport aloqalarini rad etib keladi. 1947-yilda Pokiston Hindistondan ajralib chiqqanidan beri qo‘shnilar o‘rtasida uchta urush bo‘lib o‘tgan.
Mavzuga doir:
- AQSh Afg‘onistonga 144 mln dollarlik gumanitar yordam yuboradi
- BMTning Afg‘oniston uchun yuborgan insonparvarlik yuki hali ham Termizda saqlanayotgani ma’lum qilindi
- “Tolibon” AQShdan Afg‘onistonga tegishli mablag‘larni blokdan chiqarishni so‘radi
- AQSh Afg‘onistonga koronavirusga qarshi vaksina yetkazib bermoqchi
Izoh (0)