Novosibirsk sudi xitoyliklarga hujum qilgan olti nafar O‘zbekiston fuqarosiga hukm o‘qidi

Novosibirskda Xitoy fuqarosiga hujum qilgan olti nafar o‘zbekistonlikka hukm o‘qildi, deb xabar beradi “Kommersant”.

Ta’kidlanishicha, ishga aloqador besh nafar shaxs 8—10 yilga ozodlikdan mahrum etilgan, qotillikda ayblangan erkak esa 16 yilga qamalgan, u jazoni qattiq tartibli koloniyada o‘tashi belgilangan.

Tergov ma’lumotlariga ko‘ra, ishga aloqador shaxslar 2021-yilning 25-iyul kechasi issiqxona majmuasi hududida bo‘la turib ikki nafar Xitoy fuqarosiga hujum qilgan va ularga 1,3 million rubl zarar yetkazgan.

29-avgust kuni ular yana olti nafar Xitoy fuqarosiga hujum qilib, ularga 400 ming rubllik zarar yetkazgan. Shu bilan birga, bir nafar xitoylik o‘ldirilgan.

Avvalroq Rossiyada migrantlarni mamlakatga noqonuniy olib kirish bilan shug‘ullangan ikki nafar O‘zbekiston fuqarosi ushlangani, Tashqi mehnat migratsiyasi agentligi Moskvadagi ommaviy mushtlashuvlar bo‘yicha Rossiyadagi o‘zbekistonliklarga murojaat bilan chiqqani to‘g‘risida xabar berilgandi.