Toshkentdagi ko‘p tarmoqli klinikada budjet mablag‘lari talon-toroj qilingani aniqlanib, uning mansabdor shaxslariga jinoyat ishi qo‘zg‘atildi
Korrupsiyaga qarshi kurashish agentligi tomonidan SSV tizimidagi Tibbiyot xodimlarining kasbiy malakasini rivojlantirish markazining ko‘p tarmoqli klinikasida budjet mablag‘larining foydalanilishi, qonun hujjatlariga rioya etilish holatlari va tizimda yuzaga kelishi mumkin bo‘lgan korrupsiyaviy xavf-xatarlarning oldini olish masalalari bo‘yicha o‘rganish o‘tkazildi. Bu haqda agentlik matbuot xizmati xabar berdi.
O‘rganishda klinika mansabdor shaxslari va xodimlari tomonidan budjet mablag‘larining maqsadsiz sarf qilinishi, o‘zlashtirish va talon-toroj qilish holatlari, aslida ishlamagan xodimlar uchun oylik ish haqlari to‘lab kelinishi, tibbiyot texnikalaridan foydalanish, pullik tibbiy xizmat ko‘rsatishdan tushgan mablag‘larning maqsadsiz sarflanishi, davlat xaridlarini amalga oshirishda bir qator qonunbuzilishi holatlari aniqlangan.
O‘tkazilgan o‘rganish yakuni bo‘yicha, klinika faoliyatida jami 9 milliard 747 million 598 ming so‘mlik moliyaviy xato va kamchiliklar aniqlangan bo‘lib, shundan 586 million so‘mdan ortiq budjet mablag‘lari rastrata qilish yo‘li bilan talon-toroj qilingani ma’lum bo‘lgan.
Mavjud aniqlangan holatlar yuzasidan to‘plangan hujjatlar qonuniy qaror qabul qilish uchun Bosh prokuraturaga yuborilgan.
Shunga muvofiq, agentlik tomonidan taqdim etilgan hujjatlar asosida Bosh prokuratura huzuridagi Iqtisodiy jinoyatlarga qarshi kurashish departamenti tomonidan Tibbiyot xodimlarining kasbiy malakasini rivojlantirish markazining ko‘p tarmoqli klinikasi mansabdor shaxslariga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi bilan jinoyat ishi qo‘zg‘atilgan.
Hozirda mazkur holat yuzasidan prokuratura organlari tomonidan dastlabki tergov harakatlari olib borilmoqda.
Ma’lumot uchun, Tibbiyot xodimlarini kasbiy malakasini rivojlantirish markazining ko‘p tarmoqli klinikasi Prezidentning “Tibbiy-sanitariya sohasida kadrlarni tayyorlash va uzluksiz kasbiy rivojlantirishning mutlaqo yangi tizimini joriy etish chora-tadbirlari to‘g‘risida”gi qarori bilan 2020-yilning aprelida tashkil etilgandi.
Eslatib o‘tamiz, 2019-yilda Bosh prokuratura huzuridagi departament tomonidan Respublika ixtisoslashtirilgan akusherlik va ginekologiya ilmiy-amaliy markazida tekshiruv o‘tkazilgan, markazning ayrim mansabdorlari 15,3 milliard so‘mni o‘zlashtirgani ma’lum bo‘lgan, ushbu holat yuzasidan jinoyat ishi qo‘zg‘atilib, besh kishi qamoqqa olingan edi.
