Dunyo va o‘zbek sportiga oid 11-noyabr kunining eng muhim xabarlari dayjesti bilan tanishing.
O‘zbekiston
Superliganing qoldirilgan o‘yini bo‘lib o‘tdi
Futbol bo‘yicha O‘zbekiston Superligasining 19-turi qoldirilgan o‘yinida “Nasaf” safarda “Surxon” bilan bahs yuritdi. Umumiy hisobda to‘rtta gol urilgan o‘yinda qarshiliklar ikki to‘p farqi bilan oldinda borib, yakunda g‘alabani qo‘ldan chiqardi.
Ro‘ziqul Berdiyev va Ulug‘bek Baqoyev 2 o‘yinga chetlatildi
O‘FA tartib-intizom qo‘mitasining navbatdagi yig‘ilishi bo‘lib o‘tdi va bir qator qarorlar e’lon qilindi. Unga ko‘ra, Ro‘ziqul Berdiyev va Ulug‘bek Baqoyev 2 o‘yinga chetlatildi. “So‘g‘diyona” esa bitta uy o‘yinini tomoshabinlarsiz o‘tkazadi. Tartib-intizom qo‘mitasining qarori bilan batafsil bu yerda tanishish mumkin.
Boks bo‘yicha ayollar o‘rtasidagi JCh kelasi yilga qoldirilmoqda
Xalqaro boks assotsiatsiyasi (AIBA) dekabr oyida Turkiyada o‘tishi rejalashtirilgan ayollar o‘rtasidagi Jahon chempionatini kelgusi yilga qoldirmoqda, deb yozadi MOQ matbuot xizmati.
Qayd etilishicha, bunga sabab sifatida butun dunyoda yuzaga kelayotgan koronavirus pandemiyasining yana bir to‘lqini keltirilmoqda. Xalqaro tashkilot bu borada Turkiya milliy federatsiyasi bilan muzokara o‘tkazgani ma’lum qilingan.
Istanbul shahri 6—19-dekabr kunlari ayollar o‘rtasidagi dunyo birinchiligini qabul qilishi kerak edi. Yangi kelishuvga ko‘ra, muddat kelasi yilning mart oyiga qoldirilmoqda.
Jasurbek Yaxshiboyev va Hojiakbar Alijonov Gruziyaga qarshi o‘yinni o‘tkazib yuboradi
O‘zbekiston milliy terma jamoasi 8-noyabrdan Toshkentda o‘quv-mashg‘ulot yig‘ini o‘tkazmoqda.
Mazkur yig‘inga jarohat bilan kelgan Jasurbek Yaxshiboyev o‘zini noqulay his qilgan. Tekshiruvlar natijasiga ko‘ra, uning Gruziyaga qarshi uchrashuvni o‘tkazib yuborishi ma’lum bo‘ldi.
Shuningdek, Hojiakbar Alijonov ham jarohat sabab Gruziyaga bormaydi. Bungacha Rustam Ashurmatov, Shahboz Umarov va Doston Tursunov terma jamoa ixtiyorini tark etgandi.
Jahon
“PSJ” prezidenti Ramosning holatidan norozi
“PSJ” prezidenti Nosir Al-Helayfi jarohati tufayli hali jamoada debyut o‘tkazmagan Serxio Ramosning holatidan norozi.
L’Equipe xabariga ko‘ra, menejer 35 yoshli futbolchining sog‘lig‘i bilan bog‘liq vaziyatni diqqat bilan kuzatib bormoqda. U “PSJ” tibbiy shtabiga Ramos jarohatidan tuzalishi uchun juda ko‘p vaqt ketayotganidan shikoyat qilgan.
Biroq Ramosning atrofidagilar tiklanish jarayoni yaxshi ketayotgani, klub va uning munosabatlari iliq ekanini ma’lum qilgan.
Eslatib o‘tamiz, Ramos yozda “Real”ni erkin agent sifatida tark etganidan beri hali “PSJ”da debyut qilgani yo‘q.
Avvalroq uning umumiy mashg‘ulotlariga qaytgani haqida xabar berilgandi.
Pogba Ronaldudan ko‘proq maosh olmoqchi
Yarim himoyachi Pol Pogba “Manchester Yunayted” bilan shartnomasini uzaytirishga tayyor.
Manchester Evening News nashrining L’Equipe’ga tayanib xabar berishicha, 28 yoshli fransiyalik futbolchi klubda eng ko‘p maosh oluvchi futbolchiga aylanishni istamoqda.
Pogba haftasiga 500 ming funtdan ko‘proq maosh olmoqchi. Bu “Manchester Yunayted” va Angliya Premyer Ligasining eng ko‘p maosh oluvchi futbolchisi Krishtianu Ronaldunikidan ko‘proqdir.
Jerrard — “Aston Villa” bosh murabbiyi
Stiven Jerrard “Aston Villa” bosh murabbiyiga aylandi. Bu haqda klub rasmiy saytida xabar berildi.
Kelishuv tafsilotlari rasman e’lon qilinmagan. Biroq avvalroq 41 yoshli mutaxassisning Birmingem klubi bilan 2,5 yilga mo‘ljallangan shartnoma imzolashi ma’lum qilingandi.
Shuningdek, Jerrard “Aston Villa” tarixidagi eng ko‘p maosh oluvchi murabbiyga aylanishi aytilgandi.
Mutaxassis bungacha “Reynjers”ni boshqarib, 2020/21-yilgi mavsumda jamoa bilan Shotlandiya chempioniga aylangandi.
Ramos va Messi hamon do‘stlashib olmagan
“PSJ” futbolchilari Lionel Messi va Serxio Ramos hali do‘stlashishgani yo‘q, deb yozadi Marca.
Ta’kidlanishicha, Ramos Parij klubining ko‘plab futbolchilari bilan tezda do‘stlashib olgan, biroq garchi yomon bo‘lmasa-da, Messi bilan bunday iliq munosabatlarga erisha olmagan.
“Klasikolardagi 10 yillik qarama-qarshilikni shunchaki yo‘q qilib bo‘lmaydi”, — deydi vaziyatdan xabardor manba.
Ramos 2005-yildan 2021-yilgacha “Real”da o‘ynagan bo‘lsa, Messi 2003—2021-yillarda “Barselona” sharafini himoya qilgan.
Shuningdek, L’Equipe Ramosning “PSJ”dagi maoshini ham oshkor qildi. Unga ko‘ra, Serxio yiliga 6 million yevro miqdorida maosh oladi. Bu jamoadagi eng yuqori maoshlardan biri hisoblanadi. U yozda “Real”dan 12 million so‘ragandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)