“Hududgaz Andijon” gaz ta’minoti Izboskan tumani filiali xodimlari tomonidan gaz ballonlarini talon-toroj qilish holatlari amalga oshirilganligi aniqlandi. Bu haqda “Daryo” muxbiri xabar bermoqda.

Ta’kidlanishicha, huquq tartibot idoralari tomonidan o‘tkazilgan reyd tadbirlari davomida davlat belgisi 60 777 KAA bo‘lgan Labo avtomashinasida “Hududgaz Andijon” gaz ta’minoti Izboskan tuman gaz filiali omboridan 28 dona (616 kilogramm) suyultirilgan gaz balloni olib chiqib ketilayotgani aniqlangan.

Shundan so‘ng mutasaddi tashkilotlar tomonidan “Izboskan tumangaz” bo‘limida o‘tkazilgan inventarizatsiya davomida bo‘limning rahbar xodimlari tomonidan 2021-yilning iyun oyida aholiga yetkazib berilgan suyultirilgan gaz uchun undirilgan pul mablag‘laridan 41 million so‘m, yanvar—may oylari davomida iste’molchilarga maishiy gaz ballonlari o‘rnatib, aholidan undirilgan 340 million so‘m pul mablag‘larining 111 million so‘mi o‘zlashtirib yuborilgani aniqlangan.

Shuningdek, o‘rganishlar davomida bo‘lim hisobotlarida mavjud 600 dona aylanma maishiy gaz ballonidan 300 donasi (jami 96 million so‘mni tashkil etadi) haqiqatda mavjud emasligi ma’lum bo‘lgan. Aniqlanishicha, “Izboskan tumangaz” bo‘limi rahbar xodimlari tomonidan davlat manfaatlariga 249 million so‘m miqdorida zarar yetkazilgan.

Aniqlangan holatlar bo‘yicha Bosh prokuratura huzuridagi IJQQ Departamenti Izboskan tuman bo‘limi tomonidan tezkor surishtiruv harakatlari olib borilmoqda.