Andijonni 11 yil boshqargan Qobiljon Obidovga “O‘zbekiston Qahramoni” unvoni qaytarib berildi. U mazkur unvondan 2004-yil ayrilgandi

Andijon viloyatini 11 yil boshqargan Qobiljon Obidovga Prezident farmoniga asosan “O‘zbekiston Qahramoni” unvoni va “Oltin yulduz” medali qaytarib berildi. Bu haqda “Daryo” muxbiri xabar bermoqda.

Ma’lum bo‘lishicha, Qobiljon Obidov 1951-yilda Qo‘rg‘ontepa tumanida tug‘ilgan bo‘lib, 1972-yilda Andijon paxtachilik institutining Gidromelioratsiya fakultetini tamomlagan. Ish faoliyatini Andijon suv inshootlari qurilish tresti uchinchi qurilish-montaj boshqarmasi ustachiligidan boshlagan. Turli yillarda qurilish trestining ish boshqaruvchisi, yordamchi korxonalar boshqarmasi boshlig‘i, texnologik jamlashtirish boshqarmasi bosh muhandisi, trest boshqaruvchisi vazifalarida ishlagan. 1988—1993-yillarda Marhamat tumani hamda Andijon shahriga rahbarlik qilgan. 1993—1996, 1997—2004-yillarda Andijon viloyatini boshqargan. 1996-yildan 1997-yilga qadar bosh vazirning birinchi o‘rinbosari bo‘lgan.

1994-yildan 2004-yilga qadar O‘zbekiston Respublikasi Oliy Majlisi va mahalliy kengash deputati sifatida ham faollik ko‘rsatgan. U 2018-yildan buyon Andijon viloyati o‘rmon xo‘jaligi boshqarmasini boshqarib kelmoqda.

Obidov 1995-yilda “Mehnat shuhrati” ordeni, 1998-yilda esa “O‘zbekiston Qahramoni” unvoni bilan mukofotlangan. Biroq 2004-yilda uning unvoni noma’lum sabablarga ko‘ra qaytarib olingan. Xorijiy ommaviy axborot vositalarida unvon uning o‘g‘li bilan bog‘liq jinoyat ishi ortidan qaytarib olingani ta’kidlanadi.

Mustaqillikning 30 yilligi arafasida unga Shavkat Mirziyoyev farmoni bilan “O‘zbekiston Qahramoni” unvoni hamda “Oltin yulduz” medali qaytarib berildi.