Xorazm va Surxondaryo viloyatlarida elektr stansiyalar quriladi. Norma’ning ma’lum qilishicha, bu Prezidentning 24-iyuldagi ikki qarorida belgilandi.

Foto: “Daryo” / Madina Nurman

Birinchi hujjatga asosan Niderlandiyaning Stone City Energy kompaniyasi 1,2 milliard dollarga teng bo‘lgan Surxondaryo viloyatida quvvati 1 500-1 600 MVt bo‘lgan bug‘-gaz elektr stansiyasini 25 yil davomida qurish investitsiya loyihasini amalga oshiradi.

Loyihani amalga oshirish maqsadida “SCE Quvvat” MChJ (loyiha kompaniyasi) tashkil etilgan. Qurilish davridagi o‘z majburiyatlari lozim darajada bajarilishining ta’minoti sifatida u 30 million dollar miqdorida bank kafolatini taqdim etadi.

Ikkinchi hujjatga asosan Turkiyaning Hidro Enerji Elektrik Uretim Sanayi A.Ş. kompaniyasi Xorazm viloyatida 25 yil davomida quvvati 174 MVt bo‘lgan gaz-porshenli elektr stansiyasini qurish investitsiya loyihasini amalga oshiradi. Loyihani amalga oshirish maqsadida Odaş Enerji SA MChJ (loyiha kompaniyasi) tashkil etilgan. Qurilish davridagi o‘z majburiyatlari lozim darajada bajarilishining ta’minoti sifatida u 1,3 million dollar miqdorida bank kafolatini taqdim etadi.

Hujjatlar bilan “O‘zbekiston milliy elektr tarmoqlari” AJ va loyiha kompaniyalari o‘rtasida investitsiya loyihalari doirasida Elektr energiyasini sotib olish to‘g‘risidagi bitim ham ma’qullangan, ularga muvofiq:

loyiha kompaniyalari ishlab chiqarilgan elektr energiyasini kafolatlangan tarzda “O‘zbekiston milliy elektr tarmoqlari” AJ timsolida yagona xaridorga sotish majburiyatini olgan;

“O‘zbekiston milliy elektr tarmoqlari” AJ 25 yil davomida elektr energiyasini kafolatlangan tarzda xarid qilish majburiyatini oladi va elektr energiyasi uchun to‘lovni milliy valyutada amalga oshiradi;

“O‘zbekiston milliy elektr tarmoqlari” AJ elektr energiyasini 3 oy mobaynida sotib olishni qoplash uchun majburiyatlar bajarilishining ta’minoti sifatida loyiha kompaniyalari foydasiga chet el valyutasida imtiyozli, qoplanmaydigan shartsiz bank kafolati taqdim etadi.