Xitoy kompaniyasi Farg‘onada 700 mln dollarga quyosh elektr stansiyasi qurishni rejalashtirmoqda
Farg‘onada Xitoyning Liaoning Lide kompaniyasi taxminiy qiymati 700 millionga yetadigan, quvvati 1200 megavattgacha bo‘lgan quyosh elektr stansiyasi qurishni rejalashtirmoqda.
Viloyat hokimligi matbuot xizmatining xabar berishicha, loyiha 2-iyun kuni Farg‘ona viloyati hokimi Xayrullo Bozorov va Liaoning Lide kompaniyasi delegatsiyasi o‘rtasida bo‘lib o‘tgan uchrashuvda muhokama qilindi.
Xabarda aytilishicha, bu boradagi muzokaralar bir necha oydan buyon davom etmoqda. Loyihani amalga oshirish uchun taqdim etilgan yer maydonlari hududida so‘nggi texnik tadqiqotlar o‘tkazilmoqda. Yaqin kunlarda ushbu ishlar yakunlanib, loyihaning aniq quvvati hamda qiymati belgilanadi.
Hozirda BAAning Masdar, Fransiyaning Total Eren kompaniyalari tomonidan Navoiy va Samarqandda har birining quvvati 100 megavatt bo‘lgan quyosh fotoelektr stansiyalari qurishga kirishilganini aytib o‘tgan viloyat hokimi, Farg‘onada amalga oshirilishi rejalashtirilayotgan loyihada ham kilovatt-soat elektr energiyasi narxi ushbu kompaniyalar tomonidan taklif etilgan tariflar atrofida bo‘lishi kerakligiga e’tibor qaratgan.
Xitoy kompaniyasi Farg‘ona vodiysidagi qayta tiklanadigan energetikaning birinchi loyihasi uchun bank kreditlari emas, to‘g‘ridan to‘g‘ri investitsiyalar jalb etish rejalashtirilganini ma’lum qilgan.
Shuningdek, kompaniya ishlab chiqarilgan elektr energiyasini 25 yil muddatda sotib olishi uchun “O‘zbekiston milliy elektr tarmoqlari”ga eng maqbul tariflarni taqdim etishga tayyor ekanini bildirgan.
