Yaponiyaning Tokio shahri mezbonlik qilayotgan Olimpiadada 25-iyul kuni taekvondo bo‘yicha yarim final bahslari o‘tkazildi.

Foto: AFP

O‘zbekistonlik taekvondochi Ulug‘bek Rashidov final yo‘llanmasi uchun kechgan bahsda Bosniya va Gersegovina vakili Nedzad Hushichga qarshi dayanga chiqdi.

Ulug‘bek birinchi raundni 14:1 hisobida o‘z foydasiga hal qildi. O‘zbekistonlik sportchi ikkinchi raundni ham faol o‘tkazdi va qimmatli ochkolarni o‘z hisobiga yozdirib qo‘ydi. O‘rtacha tempda o‘tgan uchinchi raund ham Rashidov foydasiga hal bo‘ldi.

Foto: AFP

Shu tariqa Rashidov 28:5 hisobida g‘alaba qozonib, finalga chiqdi. O‘zbekiston tarixida ilk bor taekvondochi Olimpiya o‘yinlari finaliga chiqdi. Qayd etish joiz, O‘zbekistonning Tokio Olimpiadasidagi ilk medali naqd, faqat uning kumush yoki oltin bo‘lishi final jangidan so‘ng ma’lum bo‘ladi.

Finalda Ulug‘bek Bredli Sinden va Shuai Jao juftligi g‘olibiga qarshi jang qiladi. Final 25-iyul kunining kechki dasturidan o‘rin olgan bo‘lib, Toshkent vaqti bilan 17:45 dan so‘ng start oladi.

Ma’lumot uchun, Rashidov dastlabki bosqichda malilik Seydu Mofanani 38:17 hisobida mag‘lub etib, 1/8 finalga yo‘l oldi. O‘zbekistonlik sportchi chorak final yo‘llanmasi uchun jangda 3 karra jahon chempioni, Olimpiya o‘yinlarining 2 karra sovrindori janubiy koreyalik Li De Hun bilan asosiy vaqtda 19:19 hisobida qayd etdi Bahs taqdirini hal qilgan “Oltin zarba”da Rashidov 2 ochko qo‘lga kiritib, chorak finalga yo‘l oldi. Rashidov 1/4 finalda eronlik Mirhoshim Hussainini 34:22 hisobida yengdi.