AQShning 45-prezidenti Donald Trampning inauguratsiya qo‘mitasi sobiq rahbari, 74 yoshli Tomas Barrak AQSh tashqi siyosatiga ta’sir o‘tkazish uchun fitna uyushtirganlikda ayblanib, hibsga olindi. Bu haqda Associated Press xabar berdi.
Foto: Reuters
Nyu-York shtatining Bruklin shahri sudi Barrakni 2016—2018 yillarda Birlashgan Arab Amirliklari (BAA) manfaatlari yo‘lida AQSh siyosatiga ta’sir o‘tkazishga urinib, ro‘yxatdan o‘tmagan “xorijiy agent” sifatida harakat qilganlikda aybladi. Tomas Barrak, shuningdek, odil sudlovga to‘sqinlik qilishda va yolg‘on guvohlik berishda ayblangan. Barrakning o‘zi ayblovlarni rad etdi.
Ma’lumot uchun AQSh hukumati boshqa davlatlarning manfaatlari uchun ishlaydigan kompaniyalar va odamlardan “xorijiy agentlar” sifatida ro‘yxatdan o‘tishni va har olti oyda bir marta daromadlari va xarajatlari to‘g‘risida hisobot berishni talab qiladi.
AQSh hukumati, shuningdek, Barrak kampaniyasining sobiq rahbari 27 yoshli amerikalik Mettyu Graymzni BAA manfaatlari uchun lobbichilikda aybladi, shuningdek, tergov ma’lumotlariga ko‘ra, 43 yoshli BAA fuqarosi Rashid al Malik vositachi sifatida ish olib borgan.
Barrak va Graymz Janubiy Kaliforniyada hibsga olingan. Malik ozodlikda qolmoqda, u Yaqin Sharqda. Malik ilgari Los-Anjelesda yashagan, ammo 2018-yilda huquq-tartibot organlari tomonidan so‘roq qilinganidan uch kun o‘tgach, AQShni tark etgan.
Tomas Barrak — Donald Trampning eski eng yaqin do‘stlaridan biri. AP xabariga ko‘ra, Barrak Trampning jinoiy javobgarlikka tortilgan sheriklarining uzun ro‘yxatidagi eng so‘nggi shaxs.
