Afg‘oniston Qurolli kuchlari “Tolibon” harakati jangarilaridan kamida 14 ta tumanni qaytarib oldi, deb yozadi “TASS”.
Foto: “RIA Novosti”
Janglar chog‘ida hukumat qo‘shinlari tomonidan 2 mingdan ortiq jangari yo‘q qilinib, 1,4 ming kishi yarador qilindi.
Afg‘oniston Qurolli kuchlari matbuot kotibi Ajmal Umar Shinvariy ma’lum qilishicha, so‘nggi bir hafta ichida Afg‘oniston armiyasi mamlakatning yettita viloyatida, shu jumladan, Badaxshon va Badgisda 278 ta jangovar operatsiyalarni amalga oshirgan.
“Tolibon” jangarilari esa xuddi shu davrda 30 dan ortiq teraktlar sodir etib, 43 nafar tinch aholi vakilining o‘limiga sababchi bo‘ldi, 170 kishi jabrlandi.
Afg‘onistonda hukumat kuchlari va “Tolibon” jangarilari o‘rtasidagi to‘qnashuvlar AQSh prezidenti Jo Baydenning bayonotidan keyin kuchaydi, u 14-aprel kuni Afg‘onistondagi operatsiyani yakunlash qarori haqida e’lon qildi. 6-iyul holatiga, AQSh o‘z qo‘shinlarining 90 foizdan ortiq qismini mamlakatdan olib chiqib ketdi.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak.
Avvalroq “Tolibon” barcha chet el qo‘shinlari Afg‘onistonni o‘z muddatida tark etishini talab qilgani haqida xabar berilgandi. AQSh Afg‘onistondan o‘z qo‘shinlarini olib chiqish amaliyoti avgust oxiriga qadar tugashini ma’lum qildi.
Associated Press xabariga ko‘ra, AQSh qo‘shinlarining asosiy qismini olib chiqqanidan keyin Afg‘onistonda 650 ga yaqin amerikalik harbiyni qoldirmoqchi. Ta’kidlanishicha, Afg‘onistonda qoladigan harbiylar diplomatlarning xavfsizligini ta’minlaydi.
Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunladi.
