AP: AQSh harbiylari Afg‘onistondagi Bagram aviabazasini ogohlantirishsiz tark etgan

AQSh harbiylari Afg‘onistondagi Bagram aviabazasini tunda tark etgan, ketish oldidan elektr energiyasini uzib qo‘ygan va bazaning afg‘onistonlik yangi komandirini ogohlantirmagan, deb yozadi Associated Press afg‘on harbiylariga tayanib.

“Biz amerikaliklar Bagramdan chiqib ketgani haqida mish-mishlarni eshitdik ... va nihoyat, ertalab soat 07:00 ga kelib bu haqiqat ekanini, ular Bagramdan chiqib ketishganini angladik”, — dedi obyektning yangi komandiri general Mir Asadulloh Kohistani agentlikka.

Qayd etilishicha, Afg‘oniston armiyasi Kobuldan bir soat uzoqlikda joylashgan aerodromni o‘z qo‘liga olguncha obyektga talonchilar bostirib kirgan. Afg‘on harbiylarining so‘zlariga ko‘ra, bosqinchilar barak va ombor chodirlarini talon-toroj qilgan.

Harbiylardan birining aytishicha, talonchilik hujumiga Amerika harbiylari bazadan jimgina chiqib ketgandan keyin 20 daqiqa davomida elektr quvvati uzilib, obyekt zulmatda qolgani sabab bo‘lgan. Uning ta’kidlashicha, Amerika harbiylari chiqib ketganidan uch kun o‘tib ham afg‘on askarlari talonchilar qoldirib ketgan chiqindilarni tozalash bilan band bo‘lgan.

2-iyul kuni Fox News Afg‘onistondagi qo‘shinlarni olib chiqish operatsiyasi doirasida AQSh harbiylari Bagram aviabazasini tark etgani haqida xabar bergan edi. Associated Press xabariga ko‘ra, bu shuni anglatadiki, 2500-3500 harbiydan iborat AQSh qo‘shinlarning aksariyati Afg‘oniston hududidan chiqib ketgan. AQSh Qurolli Kuchlari markaziy qo‘mondonligi, o‘z navbatida, Vashington Amerika kontingentini Afg‘onistondan olib chiqilishining 50 foizdan ortig‘ini amalga oshirgani haqida xabar berdi.

Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak.

Avvalroq “Tolibon” barcha chet el qo‘shinlari Afg‘onistonni o‘z muddatida tark etishini talab qilgani haqida xabar berilgandi.

Associated Press xabariga ko‘ra, AQSh qo‘shinlarining asosiy qismini olib chiqqanidan keyin Afg‘onistonda 650 ga yaqin amerikalik harbiyni qoldirmoqchi. Ta’kidlanishicha, Afg‘onistonda qoladigan harbiylar diplomatlarning xavfsizligini ta’minlaydi.

Bugunga qadar Germaniya va Italiya Afg‘onistondan o‘z qo‘shinlarini olib chiqishni yakunladi.