O‘zbekiston milliy terma jamoasi bosh murabbiyi Vadim Abramov JCh—2022 va Osiyo Kubogi—2023 qo‘shma saralashi doirasida Saudiya Arabistoniga qarshi o‘yin oldidan matbuot anjumanida ishtirok etdi va uchrashuv haqidagi fikrlari bilan o‘rtoqlashdi.

Foto: O‘FA

Hamma tushunib turibdi, ertaga juda muhim uchrashuv bo‘ladi. Tayyorgarlik yaxshi o‘tdi. Jarohatlar yo‘q. Qum bo‘roni sabab kecha maydonda mashg‘ulot o‘tkaza olmadik. Lekin bilishimcha, raqiblarimiz ham maydonga chiqa olmadi. Shuning uchun bu muammo ikkimizga ham tegishli.

Saudiya Arabistoni terma jamoasi haqida faqat ijobiy fikr bildira olaman. Ulardan ehtiyot bo‘lish normal holat. Lekin Toshkentdagi o‘yinni eslashni xohlamasdim. Chunki o‘shandagi natija o‘yinga mos bo‘lmagan. Ertangi uchrashuv qaysi terma jamoa kuchli ekanligini ko‘rsatadi.

Dastlabki ikki o‘yindagi stadionimizda chim o‘ziga xos edi, teparoq edi. To‘p harakati sekinlashdi. Bugun mana yangi stadionni ko‘ramiz. Saudiyaning o‘yin videolarini ko‘rib chiqqanimda amin bo‘ldimki, bu yerda chim holati qulay. Bu bilan bog‘liq muammo bo‘lmasa kerak.

Vadim Abramov, O‘zbekiston milliy terma jamoasi bosh murabbiyi

Jamoalarning Toshkentda o‘tgan ilk o‘yinida Saudiya Arabistoni so‘nggi daqiqalarda g‘alabani ilib ketgandi (3:2).

Shuningdek, Saudiya ustozi Erve Renar ham o‘yin oldidan o‘z fikrlari bilan o‘rtoqlashdi.

Foto: O‘FA

“Singapur bilan o‘yin ko‘rsatdi, bizning guruh juda kuchli. Endi oldinda eng muhim o‘yinimiz kutib turibdi. O‘zbekistonni juda hurmat qilamiz. Bu kuchli jamoa. Ayniqsa Toshkentdagi uchrashuv juda raqobatli kechgandi. Ikkala jamoa ham keyingi bosqichga loyiq. Biroq futbolda har xil holatlar bo‘ladi. Bizning maqsad birinchi o‘rinni olish.

Yo‘qotishlar? Salim al-Dovsari bizning asosiy o‘yinchilardan biri edi. Uning maydonga tusha olmasligi katta yo‘qotish. Biroq futbol jamoaviy sport va murabbiyning vazifasi ana shunday vaziyatlarda muammoni bartaraf etish va buning o‘yinga salbiy ta’sirini kamaytirish”, — deydi Erve Renar.

Saudiya Arabistoni va O‘zbekiston o‘rtasidagi uchrashuv 15-iyun, seshanba kuni Toshkent vaqti bilan 23:00 da boshlanadi. Qayd etish joiz, mazkur uchrashuv g‘olibi guruhda birinchi o‘rinni egallaydi.