Ўзбекистондаги эмлаш тадбирларида фойдаланиладиган зарурий сарфловчи воситаларни харид қилиш учун қарийб 6,8 млрд сўм ажратилган

Ўзбекистондаги эмлаш тадбирларида фойдаланиладиган зарурий сарфловчи воситаларни харид қилиш учун 6 млрд 782 миллион 300 минг сўм маблағ ажратилган. Бу ҳақда АОКАда ўтказилган матбуот анжуманида Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов маълум қилди.

Қайд этилишича, Соғлиқни сақлаш вазирлиги буйруғига кўра, эмлаш тадбирларнинг бажарилиши Санитария-эпидемиология хизматида ташкил этилган штаб томонидан доимий назорат қилиниб, мувофиқлаштириш тадбирлари олиб борилмоқда.

Эмлаш жараёнида 4356 нафар шифокор қатнашмоқда.

GAVI (Global Alliance on Vaaccination and Immunization) халқаро ташкилотининг соғлиқни сақлаш тизимини мустаҳкамлаш дастури доирасида 17 та авторефрижератор, 206 та юк ташувчи минивен, 16 та енгил автотранспорт воситаси қабул қилиниб, эмлаш жараёнида фаол ишлатилмоқда.

Эмлаш жараёнида қатнашаётган 4356 нафар шифокор ҳамда 11 539 нафар ўрта тиббиёт ходими «Хавфсиз иммунизация» дастури бўйича ўқитилган.

Эслатиб ўтамиз, Ўзбекистонда коронавирусга қарши қўлланилган вакциналар сони 2,5 млн дозадан ошди. 23 майдан ўзбек—хитой вакцинаси билан эмланганларга 3-дозани қўллаш бошланди.

Маълумот учун, Ўзбекистоннинг вакцина захираси 5,4 миллион дозага етди. 10 июнь куни ZF-UZ-VAC2001 вакцинасининг миллион дозадан иборат 5-партияси, шунингдек, «Спутник V» вакцинасининг 70 минг дозалик 2-компоненти олиб келинганди.