Yevro—2020. Raqamlar so‘zlaganda: 17 yoshli “bolakay”lardan 38 yoshli “amaki”largacha

Yevro—2020 da ishtirok etadigan barcha 24 terma jamoaning qaydnomalari e’lon qilingan. Quyida tarkiblarning yosh borasidagi statistikalariga e’tibor qaratamiz.

Eng asosiysidan boshlaymiz — jamoalarning o‘rtacha yoshi. Tajribali terma jamoalar: Shvetsiya (29,2 yosh), Belgiya (29,1), Slovakiya (28,2), Finlyandiya (28,1) va Vengriya (28).

Eng yosh tarkib Turkiyada (24,9). Angliya (25,5), Ukraina (26,4) va Ispaniya (26,5) esa keyingi o‘rinlarda.

Eng yosh futbolchi polshalik Katsper Kozlovski (17 yosh). U terma jamoada allaqachon 2 ta o‘yin o‘tkazdi. U bilan birgalikda musobaqada Jud Bellinghem, Jamol Musiala va Pedri kabi yosh futbolchilar ham ishtirok etadi. 18 yoshli Ilya Zabarniy va Georgiy Sudakovlar ham qaydnomaga kiritilgan.

Hozircha Yevropa chempionatida ishtirok etgan eng yosh futbolchi — Yetro Villems bo‘lib turibdi. Niderlandiyalik himoyachi 18 yosh, 71 kunligida Yevro—2012 musobaqasida debyutini o‘tkazgan edi. Uni faqat Kozlovski va Bellinghemlar ortda qoldirishi mumkin.

Yevroda hattoki 30 yoshdan oshmagan sardorlar ham bor: Endryu Robertson (Shotlandiya tarkibida 44 o‘yin), Harri Keyn (Angliya uchun 54 o‘yin) va Granit Jaka (Shveytsariya uchun 93). Robertson va Keyn 2018-yildayoq sardorlik bog‘ichini olganini eslatib o‘tish lozim.

Eng yoshi katta futbolchilar top-5 ligi ro‘yxatida ikki darvozabon o‘rin olgan: Martin Stekelenburg va Kreyg Gordon. Ikkalasi ham zaxira futbolchilari hisoblanadi. Maydonda asosiy rol bajaradigan futbolchilar ham mavjud: Pepe — Portugaliya himoya qo‘rg‘onining ishonchli vakili, Goran Pandev — Shimoliy Makedoniyaning asosiy futbolchisi, Jirkov esa Rossiya terma jamoasining chap qanotini yopishga urinadi.

Krishtianu Ronaldu — Yevro—2020 ning asosiy faxriy futbolchisi. Portugaliyalik yulduz ushbu musobaqada beshinchi bor ishtirok etadi. Yevrodagi o‘yinlar soni bo‘yicha Iker Kasilyasni ortda qoldirdi. Oldinda hech kim yo‘q. Shuning uchun Ronaldu rekordchiga aylanadi. 2024-yilgi musobaqada esa u 39 yoshda bo‘ladi.