Namangan viloyatining Chortoq tumani hokimligi “Baland adir” massividagi issiqxona holati haqida ijtimoiy tarmoqlarda tarqalgan videolavha yuzasidan rasmiy bayonot berdi. Videoreportajda issiqxona foydalanishga topshirilib, Shavkat Mirzyoyevga namoyish etilganidan bir yil o‘tib xarobaga aylangani aytilgan.

Foto: Chortoq tuman hokimligi matbuot xizmati

Tuman hokimligining ma’lum qilishicha, 1000 ta kichik hajmdagi issiqxona haqiqatan ham 2020-yilda “Golden Nuts Namangan” tomorqa agroxizmati MChJ ishtirokida qurilgan. Buning uchun jami 13,4 milliard so‘m mablag‘ sarflangan va unda 1000 ta yangi ish o‘rni yaratilib, “temir daftar”, “ayollar daftari” va “yoshlar daftari”da turgan fuqarolar ishga joylashtirilgan.

Shuningek, kelib-ketuvchilarga qulaylik yaratish maqsadida tuman markazidan “Baland adir” massiviga bepul avtobus qatnovi yo‘lga qo‘yilgani ta’kidlangan.

“Issiqxonalarda mingga yaqin tomorqachi dehqonlar ishlashmoqda. Pomidorning Bo‘ron navini ekkanmiz. U ikki haftadan so‘ng pishadi. To‘laligicha Rossiyaga eksport qilamiz. Shu kunga qadar 1,5 million dollarlik amaliyotini bajardik. Yil oxiriga qadar bu ko‘rsatkich 5 million dollarga yetadi”, — degan tomorqa xizmati rahbari Ahadjon Egamberdiyev.

Hokimlikning bildirishicha, 31-may va 2-iyun kunlari bo‘lib o‘tgan kuchli shamol oqibatida issiqxonalarning 30—35 foiz qismiga jiddiy zarar yetgan.

“Bu kamchiliklarni bartaraf etish bo‘yicha tuman hokimligida muhokama yig‘ilishi o‘tkazilib, amalga oshirilgan ishlar bilan bir qatorda yo‘l qo‘yilgan xato va kamchiliklar tahlil qilib chiqildi. Kuchli shamol oqibatlarini bartaraf etish maqsadida issiqxonalarda jadal ekish va ta’mirlash ishlari olib borilmoqda”, — deya ta’kidlangan xabarda.