O‘zbekistonning Olmaotadagi Bosh konsulxonasi mamlakat fuqarolariga 2021-yil 5-iyun kuni Qozog‘iston hududida chet elliklarning vaqtinchalik bo‘lish muddati tugashini eslatdi, deb xabar beradi “Dunyo” agentligi.
“Qozog‘iston vakolatli organlariga ko‘ra, 2021-yil 5-iyun kuni respublika hududida chet elliklarning vaqtinchalik qolish muddati tugaydi. COVID-19 pandemiyasi munosabati bilan xorijliklarni mamlakatdan chiqib ketishiga imkoniyat bo‘lmagani bois vaqtincha bo‘lib turish muddatlari bir necha marta uzaytirilgan edi. Shu munosabat bilan chet elliklar va ularni taklif qilgan shaxslarni ma’muriy javobgarlikka tortishning oldini olish maqsadida belgilangan muddatgacha Qozog‘iston hududida qolishni qonuniylashtirish so‘raladi”, — deyiladi Bosh konsulxona xabarida.
Qozog‘iston hukumati xabarida ayni paytda davlat chegarasidagi yer va havo qatnovlari odatiy tarzda faoliyat yuritayotgani qayd etilgan. Rossiya, Belarus, Qirg‘iziston, O‘zbekiston, Tojikiston, Janubiy Koreya, Ukraina, Turkiya, Misr, Germaniya, Birlashgan Arab Amirliklari, Niderlandiya, Gruziya, Chernogoriya va Shri-Lanka kabi 15 davlat bilan muntazam qatnovlar yo‘lga qo‘yilgan.
Ta’kidlanishicha, Qozog‘iston chegara xizmati chet ellik fuqarolarning mamlakatdan to‘siqsiz qaytishi uchun barcha chora-tadbirlarni amalga oshiradi.
Yuqoridagilarni hisobga olgan holda, Bosh konsulxona O‘zbekiston fuqarolaridan Qozog‘iston hududida vaqtincha bo‘lib turish muddati tugagan bo‘lsa, o‘zlarining yashash joyidagi ichki ishlar organlarida mamlakatda qolish holatini qonuniylashtirish yoki 2021-yil 5-iyundan oldin mamlakat hududini tark etishini tavsiya qiladi.
Avvalroq Shavkat Mirziyoyevning 25-fevraldagi qarori bilan O‘zbekiston va Qozog‘iston hukumatlari o‘rtasida mehnat faoliyati va Qozog‘istonda O‘zbekiston fuqarosi bo‘lgan mehnat muhojirlari va O‘zbekistonda Qozog‘iston fuqarosi bo‘lgan mehnat muhojirlari huquqlarini himoya qilish to‘g‘risidagi bitim tasdiqlangani haqida xabar berilgan edi.
Izoh (0)