“Terma jamoa muvaffaqiyati shaxsiy muammolardan ustun”. Karim Benzema 6 yillik taqiqdan so‘ng Fransiya terma jamoasiga qaytgani haqida

Didye Desham Fransiya terma jamoasining Yevro—2020 musobaqasi uchun qaydnomani e’lon qildi. Undan “Real” hujumchisi Karim Benzema ham o‘rin oldi.

Benzema terma jamoa safida so‘nggi bor 2015-yilning oktabrida harakat qilgan — 2051 kun avval. O‘shanda fransuzlar Armanistonni 4:0 hisobida dog‘da qoldirgan, Benzema dubl qayd etib, Antuan Grizmanning goliga hammuallif bo‘lgandi.

Bu vaqtni tasavvur qilish uchun: Yevro—2020 qaydnomasidan o‘sha o‘yinda ishtirok etgan faqat 8 futbolchi o‘rin oldi — Grizmann, Ugo Lyoris, Rafael Varan, Olivye Jiru, Mussa Sissoko, Kurt Zuma, Lyuka Din va Benzema. U tarkibda Patris Evra, Mamadu Sako, Lassana Diarra kabi o‘yinchilar bor edi.

Terma jamoadan ketish sababi

Karim 2015-yilda jamoadoshi Matyo Valbuena bilan bo‘lgan mojarolar sabab terma jamoadan chetlatilgandi. O‘shanda noma’lum shaxslar Valbuenaning ishqiy munosabatlari tasvirlangan videoni tarqatib yuborish bilan qo‘rqitib, undan pul talab qilgan, Benzema esa jinoyatchilar va Valbuena o‘rtasida vositachi bo‘lgani gumon qilingan.

O‘shanda Benzemadan hatto Fransiya siyosatchilari ham yuz o‘girgandi. Fransiya bosh vaziri Manuel Vals terma jamoada Benzemaga o‘rin yo‘qligini aytgandi. Natijada Karim Yevro—2016 ga chaqirilmadi va bunda Didye Deshamni aybladi.

Shundan keyin Fransiya futbol federatsiya rahbari Benzema uchun terma jamoa eshiklari yopilganini aytdi. Bunga javoban Karim ota-onasining vatani bo‘lgan Jazoir fuqaroligini olmoqchi bo‘ldi, biroq bu jarayon juda murakkab edi.

Aytgancha, Benzema va Valbuenaning “shantaj ishi” hali yakuniga yetmadi. Joriy yilning oktabr oyida Karim ayblanuvchilardan biri sifatida sudda qishtirok etadi. Biroq bu uning Yevro—2020 musobaqasiga chaqirilishiga xalal bermadi.

Desham yanvar oyida Benzemaga iltimos bilan chiqmasligini aytgandi. Biroq ular uchrashdi — va Karim terma jamoada

Qizig‘i, Desham qishda ham Benzemani terma jamoada ko‘rish niyati yo‘qligini aytgandi va bu futbol tufayli emas, hujumchi uni irqchilikda ayblagani uchun.

“Bu hali mening xotiramda qolgan. Garchi bu biroz vaqt o‘tib unutilsa ham, baribir men hech qachon yoddan chiqara olmayman. Bu murabbiyning taktika, texnik jihatlar bilan bog‘liq tanloviga aloqador bo‘lsa tushunarli. Biroq bu yerda chegaradan o‘tib ketilgandi. Bu mening nomimga, oilamga isnod keltirdi. Bu men uchun hurmatsizlik”, — degan edi Desham.

Yarim yildan kamroq vaqt o‘tdi, Benzema esa terma jamoada. Desham bu qaror o‘ziniki ekanini ma’lum qildi:

“Uni terma jamoaga chaqirish qarorini hozirgina qabul qildim. Biroq bu fikr miyamda qanchadir vaqt mobaynida aylanib yurgandi. Men u bilan uchrashdim, uzun suhbat qurdik, keyin yaxshilab o‘ylab ko‘rdim va shu qarorga keldim. Bu suhbat tafsilotlarini ochiqlamoqchi emasman. Uni tashkil qilish istagi kimdan chiqqani ham muhim emas.

Menda javobgarlik bor — jamoaning muvaffaqiyati shaxsiy muammolarimdan ustun. Karimning kelishi terma jamoa muhitiga ta’sir qiladimi? Javobim qarorimda mujassam. Hatto 23 futbolchidan iborat tarkib bo‘lganda ham, Karim undan joy olgan bo‘lardi”.

Fransiya terma jamoasida hujumchilar bilan bog‘liq muammo bor. Benzema uni hal qilishi kerak

G‘alati eshitilmasin, amaldagi Jahon chempionida hujumchilar bilan bog‘liq muammo bor. Mart oyidagi yig‘inlarga Desham olti nafar hujum vakilini jalb qildi: Olivye Jiru, Kilian Mbappe, Antuan Grizmann, Antoni Marsyal va Vissam ben-Yedder.

Ukraina, Qozog‘iston va Bosniyaga qarshi kechgan bahslarda ular ikkita gol (ikkisi ham Grizmann) urishga erishdi. Shu bilan birga terma jamoada Grizmann doim ham markaziy hujumda o‘ynamaydi, Mbappe ko‘pincha qanotda harakat qiladi, Marsyal esa jarohat olgan va musobaqa startiga qadar formaga qaytishi ehtimoli kam.

Jiru 2020-yilda yaxshi statistika qayd etayotgandi, biroq Tomas Tuxel “Chelsi”ga kelishi bilan futbolchi zaxira o‘rindig‘iga “mixlandi”. U 21-martdan buyon asosiy tarkibda maydonga tushmadi.

Shundan ekan Benzemaning taklif qilishini mantiqli qaror: 33 yoshli forvard joriy mavsumdagi 45 ta o‘yinda 29 ta gol urdi.

Fransiyani Yevro—2020 guruh bosqichidayoq Germaniya va Portugaliyaga qarshi qiyin o‘yinlar kutmoqda.

Ko‘plab futbolchilar Benzemaning qaytganidan mamnun, Kilian allaqachon Karimni tabrikladi.

Bu qarorga faqat Olivye Jiru qarshi bo‘lishi mumkin. Benzema avvalroq uni o‘zi bilan solishtirgandi: “Qisqa qilaman: keling, Formula-1 bilan kartingni adashtirmaymiz. U haqda boshqa gapirishni xohlamayman. Formula-1 men ekanimni bilaman”. Biroq jurnalist Saber Desfarjga ko‘ra, Olivye Karimning terma jamoaga qaytarilishini yoqlab chiqqanlar qatorida bo‘lgan.

Deshamning fikricha ikki hujumchi birgalikda harakat qila oladi: “Ular bir-biriga xalal bermaydi, ular birgalikda to‘p surgan. Tarkibda ikkisiga ham joy bor. Shunisi aniqki, Jiruning klubdagi holati fevraldan beri og‘ir ahvolda”.

Karimning o‘zi bu qarordan xursand: “Terma jamoaga qaytishdan shodman. Menga ishonch bildirganlaridan minnatdorman. Meni har kuni qo‘llab-quvvatlagan va kuch bergan oilam, do‘stlarim, klubim, barchaga rahmat aytaman”.