AQShda benzin tanqisligi yuzaga kelgani bois ko‘pchilik haydovchilar yonilg‘i g‘amlashga kirishib ketdi. Florida shtatida Hummer’ning yo‘ltanlamasi yukxonasiga qariyb 80 litr benzin yuklagan haydovchi ham shunday yo‘l tutgan. Biroq u uyiga qadar yetib bora olmagan: yonilg‘i quyish shoxobchasidan chiqqanidan ko‘p o‘tmay, avtomobil yonib ketgan, deb xabar beradi Motor.
O‘t o‘chiruvchilar 12-may kuni kelib tushgan chaqiriq bo‘yicha manzilga yetib borgan. Ular yonayotgan Hummer’ni o‘chirishga 20 daqiqa vaqt sarflagan va oqibatida avtomobil to‘liq yonib ketgan. Yong‘inga aynan nima sabab bo‘lganini aniqlashning imkoni bo‘lmagan.
Carscoops nashri tomonidan e’lon qilingan suratlarda yo‘ltanlamas kuzovi va yukxonadagi erigan plastik kanistrlarni ko‘rish mumkin. Biroz kuyish jarohatini olgan haydovchining ma’lum qilishicha, u Hummer’iga to‘rtta 19 litrli idishlarni yuklagan — mashina jami 76 litr yonilg‘i olib ketayotgan bo‘lgan.
Eslatib o‘tamiz, AQShdagi eng yirik yonilg‘i quvurlari operatori bo‘lgan Colonial Pipeline kompaniyasi xakerlik hujumiga uchradi. AQSh rasmiylari yoqilg‘i tanqisligi xavfi tufayli mintaqada favqulodda holat e’lon qildi. Mamlakatdagi yonilg‘i quyish shoxobchalarida uzun navbatlar paydo bo‘lib, asabiylashgan haydovchilar o‘rtasida esa benzin uchun vaqti-vaqti bilan o‘zaro nizolar kelib chiqa boshladi.
Shundan keyin, kompaniya xakerlarga 5 mln dollar to‘lab, kiberhujumdan so‘ng quvur liniyasi faoliyati qayta tiklangani haqida xabar berildi. Bloomberg va The New York Times gazetalarining yozishicha, kompaniya quvur tizimini qayta tiklash uchun pul talab qilgan kiberhujumchilarga taxminan 75 bitkoin yoki 5 million dollar to‘lagan.
Colonial Pipeline quvur liniyasining uzunligi 8800 kilometrdan oshadi. AQSh Sharqiy sohiliga yetkaziladigan benzin, dizel yoqilg‘isi va boshqa neft mahsulotlarining 45 foizi shu quvur orqali o‘tadi. Kompaniyaga uyushtirilgan kiberhujum AQShning bir qator shtatlarida benzinga talab ortishiga sabab bo‘ldi.
Izoh (0)