Sportkar narxidagi libos: Yulduzlarning “Oskar” tarixidagi eng qimmat va hashamatli obrazlari (foto)

Yulduzlar alohida tadbir va ziyofatlar uchun o‘ziga xos libos kiyishni afzal biladi. Gollivudda o‘z o‘rniga ega bo‘lgan aktrisalar tomonidan “Oskar” taqdirlash marosimiga kiyilgan eng qimmatbaho liboslar suratini e’tiboringizga havola qilamiz.

Jennifer Lourens (4 million dollar)

Aktrisa ilk bor 2013-yilgi marosimda paydo bo‘lgan. Dior brendi tomonidan taqdim qilingan, etak qismi keng oq libos atrofdagilarni o‘ziga mahliyo etmay qolmagan. 4 million dollarlik libos mukofotni qabul qilib olish uchun chiqayotgan aktrisaning yiqilishiga sabab bo‘lgan.

Sharliz Teron (100 ming dollar)

Aynan shu yilgi taqdirlash marosimida o‘ziga xos uslubda kiyingan Sharliz obraz borasida Lourensga raqib bo‘la olgan. Aktrisa Christian Dior’dan narxi 100 ming dollarni tashkil qiladigan oq ko‘ylak kiygan. Qo‘l ishi bilan mayda kristallar tikilgan libos bilan Sharliz Harry Winston’dan 4 million dollarlik bilakuzuk taqqan.

Lyupita Niongo (150 ming dollar)

Lyupitaning Calvin Klein brendidan minglab marvaridlar bilan qoplangan oq libosi ham taqdirlash marosimining eng mashhur obrazlaridan biri hisoblangan. Gap shundaki, marosimidan keyin o‘g‘irlab ketilgan mazkur libos necha kunlardan keyin topilgan.

Keyt Blanshett (200 ming dollar)

2007-yilgi “Oskar”ning eng hashamatli libos egasi esa Keytga tegishli bo‘lgan. Yulduz Swarovski kristallari bilan bezatilgan 200 ming dollarlik Armani Privé libosida tashrif buyurgan.

Nikol Kidman (2 million dollar)

Nikol 1997-yil “Oskar”ning taqdirlash marosimiga Dizayner Jon Galyano tomonidan sariq ipak matosidan tikilgan o‘ziga xos libos kiyishni afzal bilgan.

Keyt Uinslett (100 ming dollar)

2007-yilgi “Oskar” marosimidagi Keytning kiygan libosi oddiy va sipo ko‘rinsa ham, unga naqd 100 ming dollarga tushgan.

Odri Xepbern (131 ming dollar)

Odri Givenchy’ning gipyur matosidan tikilgan nafis libosida “Rim ta’tili” filmi uchun “Oskar”ni qo‘lga kiritgan. 2011-yilda mazkur libos auksionda 131 ming dollarga sotilgan.

Enn Xeteuey (80 ming dollar)

2011-yilgi marosimda boshlovchilik qilgan Enn 80 ming dollarlik Valentino libosini kiygan. 10 ming dollarlik Tiffany & Co taqinchog‘i esa obrazining yanada o‘ziga xos ko‘rinishiga sabab bo‘lgan.

Jessika Bill (100 ming dollar)

Aktrisa 2014-yilgi “Oskar” taqdirlash marosimi uchun Chanel Couture’dan biser bilan qoplangan oq libos tanlagan. Bu obraz yulduzga 100 ming dollarga tushgan.