Ўзбекистонда электр, иссиқлик энергияси, газ, сувдан фойдаланиш қоидаларини бузиш билан боғлиқ маъмурий ҳуқуқбузарликлар тўғрисидаги ишларни кўриб чиқиш ва жазо қўллаш ваколати профилактика инспекторларига берилмайдиган бўлди. Бу ҳақда Олий Мажлис Қонунчилик палатаси хабар берди.
Бундай ўзгариш «Мамурий жавобгарлик тўғрисида»ги кодексга ўзгартириш ва қўшимчалар киритиш бўйича қонун лойиҳасида кўзда тутилганди. Қуйи палатанинг 7 апрель куни бўлиб ўтган мажлисида ушбу лойиҳа қизғин муҳокамаларга сабаб бўлиб, биринчи ўқишда концептуал жиҳатдан қабул қилинган эди. Амалда бу турдаги қоидабузарликлар билан МИБ органлари шуғулланиб келган.
19 апрель куни Олий Мажлис Қонунчилик палатасининг навбатдаги мажлиси бўлиб ўтди. Унда «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳаси депутатлар томонидан иккинчи ўқишда кўриб чиқилган.
Муҳокамаларда депутатлар ички ишлар органлари таянч пунктларининг профилактика (катта) инспекторларига қўшимча тариқасида берилаётган вазифалар қатор муаммоларни келтириб чиқаришини таъкидлаган. Халқ вакилларининг фикрича, бу уларда асосий ишидан ташқари иш кўлами ортишига, манфаатлар тўқнашуви, коррупцион ҳолатлар кўпайишига сабаб бўлиши мумкин.
Мунозараларда иштирок этган ИИВ масъуллари ҳам белгиланаётган нормаларга қўшилмасликларини билдириб, бугунги кунда профилактика инспекторлари зиммасига кўплаб вазифалар юклатилаётгани, ҳар қайси жиҳатдан ёндашилган тақдирда ҳам қўйилган вазифани бажаришга амалий вақт етмаслигини, қолаверса, профилактика инспекторлари бу соҳада алоҳида мутахассис эмасликларини қайд этган.
Қонун лойиҳаси овозга қўйилгач, депутатларнинг кўпчилиги унга қарши овоз берган ва у масъул қўмитага қайтарилган.
Эслатиб ўтамиз, 2020 йилнинг ноябрь ойида Ўзбекистонда маъмурий ишларни кўриб чиқиш ваколати судлардан профилактика инспекторларига ўтказилиши мумкинлиги айтилганди.
Изоҳ (0)