Amerikaning Chikago va Ostin shaharlarida otishmalar sodir bo‘ldi. Qurbonlar orasida 7 yoshli qizcha bor

Amerikaning Chikago shahridagi McDonald’s restorani yaqinida sodir bo‘lgan otishma oqibatida yetti yoshli qizcha halok bo‘ldi, 29 yoshli erkak jarohat oldi. Bu haqda politsiyaning NBC Chicago telekanaliga bergan ma’lumotiga tayanib, “RBK” xabar berdi.

Telekanal ma’lumotlariga ko‘ra, otishma boshlanganda qiz va erkak tarmoqdagi restoranlardan birining tashqarisida mashinada bo‘lgan. Qizcha bir nechta jarohatlar bilan kasalxonaga olib ketilgan. Shifokorlar uning kasalxonaga yetmasdan vafot etganini aniqlagan.

Ikkinchi jabrlanuvchi og‘ir ahvolda kasalxonaga yotqizilgan. ABC News va WGN-TV jarohat olgan erkak qizning otasi ekani haqida xabar bergan. O‘q uzgan shaxs hali hibsga olinmagan.

Shuningdek, Texas shtatining Ostin shahrida otishma sodir etilib, oqibatda uch kishi halok bo‘lgani haqida xabar berildi.

Politsiya ma’lumotlariga ko‘ra, noma’lum shaxs shahar chetidagi chorrahada o‘q uzgan. Huquqni muhofaza qilish organlari o‘t ochgan kishining shaxsi va hodisaning ehtimoliy sabablari to‘g‘risida hali ma’lumotlarga ega emasligini aytdi.

Politsiya hodisa maishiy xarakterga ega deb taxmin qildi. Xabarda aytilishicha, gumondor hanuzgacha ozodlikda bo‘lsa-da, aholi uchun hech qanday xavf yo‘q.

So‘nggi haftalar ichida Qo‘shma Shtatlarda bir nechta otishma hodisalari yuz berdi. Xususan, 15-aprel kuni Indiana shtati Indianapolis shahridagi FedEx logistika kompaniyasi omboridagi otishmada sakkiz kishi halok bo‘lgan. Yana to‘rt kishi jarohatlar bilan kasalxonalarga yetkazilgan.

12-aprel kuni esa AQShning Tennessi shtati Noksvill shahrida joylashgan maktabda otishma yuz bergan edi, oqibatda bir kishi halok bo‘lgan, politsiya ofitseri yaralanib, kasalxonaga yetkazilgan. 31-mart kuni Kaliforniya shtatining Orinj okrugida yuz bergan otishma oqibatida to‘rt kishi halok bo‘lgan, bir kishi yaralangan.

22-mart kuni Kolorado shtatining Boulder shahridagi supermarketda 21 yoshli Ahmat Alissa otishma sodir etgan, oqibatda 10 kishi, shu jumladan, bir nafar politsiya xodimi halok bo‘lgan. Rasmiy ma’lumotlarga ko‘ra, gumondor otishmadan olti kun oldin hujum qurolini sotib olgan. AQSh prezidenti Jo Bayden Koloradodagi otishma oqibatida halok bo‘lganlar xotirasiga besh kunlik motam e’lon qilgan.

Avvalroq Jo Bayden AQSh Kongressiga qurol sotishga oid shartlarni murakkablashtirishni taklif qilgani haqida xabar berilgandi.