“O‘zbekkosmos”ning maqsad va vazifalari to‘g‘risida hukumat qarori qabul qilindi

Vazirlar Mahkamasi huzuridagi Kosmik tadqiqotlar va texnologiyalar agentligi faoliyatini tashkil etish chora-tadbirlari to‘g‘risidagi hukumat qarori qabul qilindi. Bu haqda “Huquqiy axborot” kanali xabar berdi.

Qaror bilan Kosmik tadqiqotlar va texnologiyalar agentligi to‘g‘risidagi nizom hamda ushbu agentlik tuzilmasi tasdiqlandi.

Qarorga muvofiq, agentlik o‘z faoliyatida mustaqil bo‘lib, faqatgina Vazirlar Mahkamasiga bo‘ysunadi.

Qaror bilan tasdiqlangan nizomga ko‘ra, mazkur agentlik kosmik tadqiqotlar va texnologiyalar sohasida yagona davlat siyosati va strategik yo‘nalishlarni ishlab chiqish va amalga oshirish uchun mas’ul davlat boshqaruvi organi hisoblanadi.

Agentlik bosh direktori va o‘rinbosarlari hukumat qarori bilan lavozimga tayinlanadi va ozod etiladi.

Eslatib o‘tamiz, O‘zbekiston Prezidentni avgust oyida “O‘zbekiston Respublikasida kosmik faoliyatni rivojlantirish to‘g‘risida”gi farmonni imzolagan edi. Farmonga ko‘ra, “O‘zbekkosmos” agentligi kosmik tadqiqotlar va texnologiyalar sohasida yagona davlat siyosati va strategik yo‘nalishlarni ishlab chiqish va amalga oshirish uchun mas’ul bo‘lgan davlat boshqaruvi organi hisoblanadi.