Ўзбекистон ва Россия Шавкат Мирзиёевнинг Москвага ташрифи давомида космосдаги ҳамкорлик бўйича ҳукуматлараро битимни имзолаши мумкин

Россия ва Ўзбекистон ҳукумати Президент Шавкат Мирзиёевнинг амалга ошириши кутилаётган ташриф арафасида космик соҳада ҳамкорлик қилиш тўғрисидаги ҳукуматлараро битимни имзолашни режалаштирмоқда. Бу ҳақда Россиянинг республикадаги элчиси Олег Мальгиновга таяниб, «Подробно» хабар берди.

«Бугунги кунда Россия ва Ўзбекистоннинг турли соҳалардаги ўзаро алоқалари космик юксакликка қадар кўтарилганлигини тўла ишонч билан айта оламиз. Ўзбекистон Президентининг Москвага амалга ошириши кутилаётган ташриф давомида имзоланиши кутилаётган Россия ва Ўзбекистон ҳукуматининг тинчлик мақсадларида космик соҳада ҳамкорлик қилиш тўғрисида ҳукуматлараро битими матни маъқулланди», — дейди у.

Элчининг сўзларига кўра, томонлар Ўзбекистоннинг Жиззах вилоятида «Суффа» радиоастрономия расадхонасини қуриш лойиҳаси устида ишлашни давом эттирмоқда. «У илғор илмий изланишларга имкон берадиган энг катта радио телескоп билан жиҳозланиш режалаштирилган», — деб қўшимча қилади Мальгинов.

Аввалроқ «Роскосмос» давлат корпорацияси Ўзбекистонга биринчи ўзбек сунъий йўлдошларини яратишни молиялаштириш ва уларни йиғишни қисман маҳаллийлаштириш, шунингдек, космик чиқиндилар ва ерни масофадан зондлаш соҳасидаги шерикликни ривожлантириш таклифини берган.

1995 йилда икки мамлакат ҳукуматлари Тошкентдан 250 километр узоқликда жойлашган Суффа платосида халқаро радиоастрономия расадхонасини ташкил этиш тўғрисида битим имзолаган. Расадхонанинг асосий қисми — кўзгу диаметри 70 метр бўлган ноёб радио телескопни 2009 йилда фойдаланишга топшириш режалаштирилган эди. Бироқ расадхона охиригача қуриб битказилмаган, бунга молиялаштириш билан боғлиқ муаммолар сабаб бўлган.

Кўзгусининг диаметри 70 метрни ташкил этади мазкур радиотелескоп тўлиқ ҳаракатланувчи дунёдаги энг катта радиотелескоп ҳисобланади. Бу турдаги радиотелескопдан ҳозирга қадар учта яратилган.

Эслатиб ўтамиз, Шавкат Мирзиёев 2021 йилда Россияга давлат ташрифи билан бориши ҳақида Ўзбекистон ташқи ишлар вазири Абдулазиз Комиловнинг 21 декабрь куни россиялик ҳамкасби Сергей Лавров билан учрашувида айтиб ўтилган эди. Президент матбуот котиби Шерзод Асадов 9 апрель куни ўтказилган брифингда Шавкат Мирзиёевнинг Россияга расмий ташрифи санаси коронавирус билан боғлиқ вазиятга бориб тақалишини маълум қилганди.