Hyundai kompaniyasi Hindiston bozori uchun Creta’ning yetti o‘rindiqli versiyasini Alcazar nomi ostida taqdim etishga tayyorlanmoqda. 6-aprelga rejalashtirilgan taqdimotda Janubiy Koreya kompaniyasi yangi modelning rasman birinchi videosi bilan bo‘lishdi, deb xabar beradi Motor.

Kadr: YouTube

Yangi rolik Alcazar Hyundai Creta’ning uzaytirilgan versiyasi ekanligini tasdiqlaydi. Bunga qadar e’lon qilingan tizerda Alcazar’ning C-simon shakldagi orqa faralari uning Creta’dan farqini yaqqol ko‘rsatib qo‘ygan edi. Bundan tashqari, yangi model radiator panjarasi bilan to‘ldirilgan o‘zgacha old bamper va orqa qora ustunchalarga ega bo‘lgan.

Hyundai Alcazar ikki xil versiyada taqdim etiladi: olti va yetti o‘rindiqli. Birinchi uzaytirilgan krossover ikkinchi qatorda “kapitan” o‘rindig‘iga ega bo‘ladi, yetti o‘rindiqli model esa suyang‘ichi 60:40 proporsiyada yig‘iladigan divan bilan jihozlanadi.

Taxminlarga ko‘ra, Hyundai Alcazar saloniga virtual qurilmalar paneli va 10,25 dyuymli multimedia tizimiga ega sensorli displey o‘rnatiladi. Salonidagi ranglar farqi, biroz o‘zgartirilgan markaziy tunnel, shuningdek, ikkinchi qatordagi yo‘lovchilarning gadjetlari uchun mo‘ljallangan simsiz quvvatlantirgich yangi modelning o‘ziga xos jihatiga aylanadi.

The Indian Car News ma’lumotlariga ko‘ra, ushbu model Hindiston Creta’si bilan motor gammasini to‘liq bo‘lishmaydi. Benzin variantli versiyasiga 152 ot kuchi va 192 Nm aylanuvchi momentni taqdim etishga qodir to‘rt silindrga ega 2,0 litrli motor o‘rnatiladi.

Kadr: YouTube

115 ot kuchi va 250 Nm aylanuvchi momentni taqdim etuvchi 1,5 litrli dizel motor Alcazar uchun muqobil variantga aylanishi mumkin. Bu kabi dvigatel oddiy Creta’ga o‘rnatilgan, biroq og‘irroq model uchun u qayta sozlanadi. Transmissiya — olti pog‘onali “mexanika” yoki avtomatik quti.

Hyundai Alcazar premyerasi 6-aprel kuni bo‘lib o‘tadi, krossover Hindiston bozoriga 2021-yil oxirida chiqishi kutilmoqda.

Avvalroq Hyundai kompaniyasi futuristik tashqi ko‘rinishga ega yangi Staria minivenini yaratayotgani to‘g‘risida xabar berilgandi.