“Bundan buyon O‘zbekistonda biror-bir ayol davlat va jamiyatning e’tiboridan chetda qolmaydi” – Shavkat Mirziyoyev

Oxirgi 3 oyda “ayollar daftari”ga kiritilgan 80 ming nafar xotin-qizning muammolari hal etildi. Ijtimoiy himoyaga muhtoj, turmush sharoiti og‘ir ayollarning 32 ming nafari ish bilan ta’minlandi. Bu haqda ayni paytda Toshkent shahridagi Kongress-xollda 8-mart – Xalqaro xotin-qizlar kuni munosabati bilan o‘tkazilayotgan tantanali marosimda O‘zbekiston Prezidenti Shavkat Mirziyoyev so‘z yuritdi, deya xabar bermoqda “Daryo” muxbiri.

“So‘nggi yillarda xotin-qizlarning huquq va manfaatlarini ta’minlash, oila institutini har tomonlama mustahkamlash bo‘yicha salmoqli ishlar amalga oshirilmoqda. Bu borada eng quyi bo‘g‘in – mahalla va xonadongacha kirib boradigan, vertikal tizim yaratilayotganini alohida ta’kidlash lozim.

Xabarlaringiz bor, joriy yilning 26-fevral kuni bo‘lib o‘tgan videoselektorda ana shu tizim asosida amalga oshirilgan ishlar va oldimizda turgan rejalarni atroflicha muhokama qilgan edik. Ana shu muhim vazifalarni amalga oshirishda siz, hurmatli opa-singillarimiz bundan buyon ham faol ishtirok etasizlar, deb ishonaman.

Keyingi vaqtda O‘zbekiston kasaba uyushmalari federatsiyasi, Mahalla va oilani qo‘llab-quvvatlash vazirligi rahbariyati boshchiligida Respublika ishchi guruhi tuzilib, barcha hududlarda ayollarni qiynayotgan muammolar aniqlandi. Ushbu muammolar bo‘yicha manzilli ish olib borish uchun mutlaqo yangi tizim – ‘ayollar daftari’ni joriy etdik”, — dedi Shavkat Mirziyoyev.

Davlat rahbarining ta’kidlashicha, inqirozga qarshi kurash jamg‘armasi mablag‘lari hisobidan salkam 17 ming nafar xotin-qizga amaliy yordam ko‘rsatilgan.

Birgina ‘Har bir oila – tadbirkor’ dasturi doirasida 126 mingga yaqin ayollarga imtiyozli kreditlar berildi. Oilaviy tadbirkorlikni rivojlantirish uchun qariyb 215 ming oilaga 6 trillion so‘mdan ziyod kredit mablag‘lari ajratildi.

Qariyb 55 ming nafar xotin-qiz tadbirkorlik va kasb-hunar markazlari tomonidan o‘qitildi, hunarmandchilik va kasanachilikka jalb etildi. ‘Besh muhim tashabbus’ doirasida chekka-chekka hududlarda tikuvchilik sexlari tashkil etilib, 10 ming nafar ayol bandligi ta’minlandi.

Uy-joy sotib olish uchun 1 ming 250 nafar opa-singillarimizga qariyb 22 milliard so‘mlik boshlang‘ich badallar to‘lab berildi. Joriy yilda ham ushbu xayrli ishlar davom ettiriladi va bu borada kuni-kecha yangi Qarorni imzoladim. Unga ko‘ra, jamiyatda ayollarimizga bo‘lgan e’tiborni eng quyi bo‘g‘ingacha, mahallagacha tushirib, ularni har tomonlama qo‘llab-quvvatlashning yaxlit tizimi yaratilmoqda. Bundan buyon O‘zbekistonda biror-bir ayol davlat va jamiyatning e’tiboridan chetda qolmaydi. Buni har bir rahbar bilishi kerak, — dedi Prezident.