Gollandiyaning The Voice shousining ruscha versiyasi bo‘lgan “Golos”ning 9-mavsumi 2020-yilning kuzida start olgan. Yakuniy natijaga ko‘ra, boshqirdistonlik Yana Gabbasova g‘olib deb topilgan. Ilk marta 2012-yilda efirga uzatilgan va nafaqat Rossiya, balki dunyoning boshqa burchaklarida ham sevib tomosha qilinadigan loyihaning barcha mavsumlaridagi eng yorqin ishtirokchilar hayotida qanday o‘zgarishlar yuz bergani haqida ma’lumot berib o‘tamiz.

Dina Garipova — 1-mavsum g‘olibi

Foto: “Domashniy ochag”

Millionlab muxlislar qalbidan joy olib, birinchi mavsumning g‘olibiga aylangan 21 yashar Dina 2013-yildagi “Yevrovideniye”da 5-o‘rinni egallagan. 22 yoshida esa Tataristondagi eng yosh xizmat ko‘rsatgan xonanda deb topilgan. “Golos”dan so‘ng boshqa ishtirokchilar bilan mamlakat bo‘ylab gastrol safarlariga chiqqan Dina keyinchalik yakkaxon konsert bera boshlagan. 2015-yilda esa Aleksandr Gradskiy nomli musiqiy teatrda aktrisa sifatida faoliyat boshlagan ijodkor bugungi kunda ham yangi qo‘shiq va kliplar taqdim qilib turadi. 4 yil avval turmushga chiqqan xonanda turmush o‘rtog‘ining ismini sir tutishni abzal biladi.

Sevara Nazarxon — 1-mavsum finali ishtirokchisi

Foto: “Domashniy ochag”

O‘zbekistonlik Sevara mazkur loyihada ishtirok etguniga qadar ham yetarlicha mashhurlik va muvaffaqiyatga erishib bo‘lgan. Repertuarida oltita yakkaxon albom bo‘lgan, Piter Gebrielning AQSh, Kanada va Yevropaning eng katta maydonlarida bo‘lib o‘tgan, ellikdan ortiq konsertlarni o‘z ichiga olgan “Growing Up” nomli jahon turida ishtirok etgan, shu bilan birga BBC World Music Award mukofotining eng yaxshi osiyolik xonanda yo‘nalishi bo‘yicha g‘olib deb topilgan. Loyiha davomida aksariyat muxlislar Sevaraga muxlislik qilgan va uning birinchi bo‘lishini istagan. “Golos”dagi ishtirokidan keyin qo‘shiqchi Rossiya kanallari orqali efirga uzatiladigan boshqa loyihalarda ham ishtirok etgan. 2016-yilda ikkinchi marta ona bo‘lgan Nazarxon biroz muddatdan keyin yangi albomi ustida ishlashni boshlab yuborgan.

Sergey Volchkov — 2- mavsum g‘olibi

Foto: “Domashniy ochag”

Ishtirokiga qadar ham bir qancha musiqiy tanlovlarda muvaffaqiyatga erishib ulgurgan Sergey g‘olib deb e’lon qilinganidan bir necha kun o‘tib ota bo‘lgan. Bugungi kunda u konsert va yangi qo‘shiqlar taqdim qilishda davom etish bilan birga, ikki nafar farzandni tarbiyalamoqda.

Nargiz Zokirova — 2-mavsum finali ishtirokchisi

Foto: “Domashniy ochag”

Hayotini o‘zgartirib yuboradigan karyera tomon qadam tashlaganida xonanda 42 yoshda bo‘lgan. AQShda X-factor nomli musiqiy loyihada ishtirok etganidan keyin Nargiz prodyuserlarning qo‘ng‘irog‘ini kutish bilan birga “Golos”da ham qatnashib ko‘rmoqchi bo‘lgan. Ishtirokidan keyin muxlislar uni eng yaxshi deb topilishiga umid qila boshlagan.

Shoudan keyin Nargiz Maksim Fadeyev bilan hamkorlik qila boshlagan. Karyera borasida omadi chopgan xonanda yangidan-yangi qo‘shiqlar taqdim qilishdan charchamaydi. Ko‘plab gastrol safarlariga boradigan va yakkaxon albom yozishga ulgurgan Nargizning hayotida ham o‘zgarish yuz bergan. U 20 yil birga yashagan turmush o‘rtog‘i, italiyalik Filipp Balzano bilan ajrashgan.

Tina Kuznetsova — 2-mavsum finali ishtirokchisi

Foto: “Domashniy ochag”

Bolaligidan musiqa bilan shug‘ullangan va folk-guruhiga asos solgan Tina asosan milliy yo‘nalishdagi qo‘shiqlarni kuylagan. Yuriy Usachevning rafiqasi bo‘lgan Kuznetsovaning Gabriel ismli farzandi bor. Yangi qo‘shiqlar yozishdan charchamaydigan xonanda Rossiya bo‘ylab konsertlar taqdim qilib turadi.

Andrey Davidyan — 2-mavsum ishtirokchisi

Foto: “Domashniy ochag”

Shirali ovozi bilan muxlislarni “sehrlash”ga muvaffaq bo‘lgan Davidyan chorak finaldan keyin loyihani tark etgan. Ammo bu bilan karyerasi to‘xtab qolmagan. Ijod qilish va qo‘shiq yozishda davom etgan Andrey esda qolarli konsert dasturlari berishga ham muvaffaq bo‘lgan. 2016-yilning noyabrida Davidyan yurak xurujidan vafot etgan.

Aleksandra Vorobyova — 3-mavsum g‘olibi

Foto: “Domashniy ochag”

G‘olib deb topilganidan keyin Aleksandra muxlislarga ko‘rinish bermay qo‘ygan. Gastrol safarlariga chiqishdan tashqari Vorobyova teatrda ham faoliyat olib bora boshlagan.

Mariam Merabova — 3-mavsum finali ishtirokchisi

Foto: “Domashniy ochag”

Loyihadagi ishtirokidan keyin “Yevrovideniye”da Dima Bilanga bek-vokalist sifatida yordam bergan Mariam, bugungi kunda jaz yo‘nalishidagi konsertlarini taqdim qilib keladi. Shoudan so‘ng ijodkor 53 kg vazn tashlagan.

Iyeromonax Fotiy — 4-mavsum g‘olibi

Foto: “Domashniy ochag”

G‘olib deb topilganidan keyin Fotiy Universal Music Russia bilan shartnoma imzolagan va Lada XRay mashinasining kalitini qo‘lga kiritgan. Loyiha tugaganidan keyin u avval faoliyat yuritganidek cherkovga qaytgan hamda cherkov xorida qo‘shiq kuylashda davom etgan.

Regina Todorenko — 4-mavsum ishtirokchisi

Foto: “Domashniy ochag”

“Oryol i reshka” ko‘rsatuvining mashhur boshlovchilaridan biri bo‘lgan Regina shoudan avval “Yulduzlar fabrikasi”da ham ishtirok etib ulgurgan. 2018-yilda xonanda Vlad Topolovga turmushga chiqqan Todorenka shu yilning dekabr oyida farzandli bo‘lgan.

Darya Antonyuk — 5-mavsum g‘olibi

Foto: “Domashniy ochag”

Darya talabalik davrida loyihada ishtirok etish uchun kelgan. Avvalroq “Izquvar” serialida suratga tushgan Antonyuk 2017-yil “Yevrovideniye”da Rossiya nomidan ishtirok etish uchun eng asosiy nomzodlardan biri bo‘lgan. Ammo nomzodlar orasidan u emas, Yuliya Samoylova tanlab olingan.

Selim Alaxyarov — 6-mavsum g‘olibi

Foto: “Domashniy ochag”

Loyihada ishtirok etguniga qadar Alaxyarov “Rossiyaning oltin ovozi” loyihasida 100 nafar ishtirokchi orasida eng yaxshisi deb topilib, Gran-prini qo‘lga kiritgan. Hay’at a’zolaridan Lyubov Kazarnovskaya Selimning iste’dodiga maftun bo‘lgan va loyihadan keyin uni “Yulduz bilan duet” loyihasiga stajirovkaga taklif qilgan. Alaxyarov “Golos”  shousida g‘olib bo‘lgan ilk kavkazlik ishtirokchi hisoblanadi.