Hukumat qaroriga ko‘ra, Sardoba suv omboridagi damba yetkazgan zararlarni ta’mirlash va qoplash ishlari “To‘palangsuvGESqurilish” MChJ va “O‘zbekiston temir yo‘llari” tomonidan amalga oshirilmoqda. Bu haqda 1- mart kuni Qurilish vazirligida o‘tkazilgan matbuot anjumanida ma’lum qilindi, deya xabar bermoqda “Daryo” muxbiri.

Foto: “Daryo”

“Vazirlar Mahkamasi taklifi bilan qaror ishlab chiqildi. Unga ko‘ra, damba yetkazgan zararlarni ta’mirlash va qoplash ishlari ‘To‘palangsuvGESqurilish’ MChJ va ‘O‘zbekiston temir yo‘llari’ga yuklatilgan. Ular bu ishlarni loyiha asosida o‘z hisobidan amalga oshirmoqda. Davlat budjetidan bir so‘m ham ishlatilayotgani yo‘q.

Suv omborini qayta qurishga oid loyihalarimiz xalqaro ekspertizadan o‘tkazilganidan so‘ng tenderga qo‘yiladi. Tender shaffoflik asosida o‘tkaziladi va unda kim yutib chiqishini vaqt ko‘rsatadi. Oldindan bir narsa deya olmaymiz. Qayta qurish jarayoni qachon boshlanishi ham aniq emas. Chunki dambani qayta tiklash ancha vaqt oladi, buyog‘iga shoshilib bo‘lmaydi”, — dedi qurilish vaziri Botir Zokirov.

Bu borada suv xo‘jaligi vaziri Shavkat Hamrayev munosabat bildirarkan, xususan, shunday dedi:

Foto: “Daryo”

“Suv omborini qayta qurish loyihasi yakuniga yetkazilgach shaffoflik asosida tender o‘tkaziladi. Unda ‘To‘palangsuvGESqurilish’ MChJ qatnashadimi, yo‘qmi, bilmaymiz. Tender jarayoni yakunida qaysi tashkilot qurishi ma’lum bo‘ladi”.