Jizzax viloyati hokimi Ergash Soliyevning o‘g‘li Elbek Soliyev hamda uning amakisi Shavkat Soliyev ishtirokidagi kompaniyalar viloyat hududida bir necha milliard so‘mlik qator loyihalarni amalga oshirib kelayotgani ma’lum bo‘ldi. Bu haqda Telegram’dagi “Davletovuz” kanalida e’lon qilingan maqolada so‘z boradi.

Foto: “Daryo” / Madina Nurman

Ma’lum bo‘lishicha, Jizzax viloyatida Rossiyaning AAA Investment Company kompaniyasi ishtirokida qator loyihalar amalga oshirilmoqda. Masalan, Vazirlar Mahkamasining 2020-yil noyabrdagi qarori bilan tasdiqlangan 2020—2022-yillarda Jizzax viloyatining Zomin tumanida sanoat, xizmat ko‘rsatish va qishloq xo‘jaligi sohalarini rivojlantirish bo‘yicha investitsiya loyihalarining manzilli ro‘yxatiga ko‘ra, mazkur kompaniya (90 foiz) va jismoniy shaxs Elbek Soliyev Ergashevich ta’sischiligida tuzilgan AAA Company qo‘shma korxonasi Duoba qishloq fuqarolar yig‘ini hududida Turistik davolash-sog‘lomlashtirish majmuasi tashkil etishi kerak. Ushbu maqsadlar uchun yer ajratish bo‘yicha 2019-yildayoq tuman hokimi qarori chiqarib qo‘yilgan.

Majmua qiymati 14 milliard so‘m bo‘lib, 7 milliard kompaniya hisobidan, 5 milliard so‘mi “Milliybank” kreditlari hisobidan, 200 ming dollarlik chet el investitsiyasi hisobidan amalga oshirilishi kerak. “Bugina emas, kompaniya tumanda chorvachilik bilan bog‘liq yana bir loyihani amalga oshirishni niyat qilgan. Qo‘shma korxona ochilgan oyning o‘zidayoq tuman hokimi yer ajratish bo‘yicha qaror chiqarib bergan”, — deyiladi xabarda.

Ta’kidlanishicha, mazkur korxona tomonidan Sharof Rashidov tumani Uchtepa qishloq fuqarolar yig‘inida umumiy qiymati 13 milliard so‘m bo‘lgan loyiha amalga oshirilgan. OAVda e’lon qilingan reklama materialidan ma’lum bo‘lishicha, “Milliybank” tomonidan ajratilgan kredit mablag‘i evaziga bouling markazi va 3D kinoteatr qurilib, zarur jihozlar xarid qilingan. 3D kinoteatr 2 ta zaldan iborat bo‘lib, har biri 50 ta tomoshabinni o‘z ichiga oladi.

Rossiyalik investor sifatida Jizzaxdagi bunyodkorliklarda ishtirok etayotgan AAA Investment Company kompaniyasi Rossiya ochiq ma’lumotlari portallariga ko‘ra, to‘laligicha Soliyev Shavkat Alibekovich ismli jismoniy shaxsga taalluqli.

Kompaniya Rossiyada 2018-yil 20-fevralda 1 million rubllik ustav fondi bilan ro‘yxatdan o‘tgan bo‘lsa, mart oyida O‘zbekistonda AAA Company qo‘shma korxonasini ochgan. Shuningdek, Shavkat Soliyev va Elbek Soliyev 2018-yil aprelida 90/10 ulushda Metan Korea qo‘shma korxonasini ham ochgan.

“Aftidan amaki-jiyanning biznes hamkorligi uzoq davrlarga borib taqaladi. Ular 2011-yilda Forish tumanida Fish Co MChJ qo‘shma korxonasini 99,5/05 foiz ulushida ochishgan. Bundan tashqari, Elbek Soliyev turar joy binolarini qurish bilan shug‘ullanadigan Riser Sun MChJning ham chorak ulushiga egalik qiladi”, — deyiladi xabarda.

Avvalroq Jizzax viloyati hokimining qiziga tegishli kompaniya ko‘chalarga gul ekish bo‘yicha 1,9 milliard so‘mlik tenderni yutib olgani to‘g‘risida xabar berilgandi.