AQSh prezidenti Jo Bayden Kongressni qurol olib yurishni tartibga soluvchi qonunlarni isloh qilishga chaqirdi. Bu haqda Oq uy rasmiy saytida e’lon qilindi, deb yozmoqda “RBK”.
“Bugun men Kongressni qurol-yarog‘ sotish paytida shaxsni tasdiqlovchi hujjat talab qilish, hujumga mo‘ljallangan va o‘qdoni katta sig‘imli qurollarni taqiqlash, mahsulotlarini atayin ko‘cha-ko‘yda tarqatayotgan qurol ishlab chiqaruvchilar uchun imtiyozlarni bekor qilish to‘g‘risidagi qonunlarni isloh qilishga chaqiraman”, — deyiladi prezident bayonotida.
Oq uy veb-saytiga joylashtirilgan Baydenning mazkur murojaati Florida shtatining Parklend shahridagi Marjory Stoneman Douglas maktabida bir yil oldin sodir bo‘lgan otishmaga bag‘ishlandi. O‘shanda intizomni buzgani uchun maktabdan chetlatilgan 19 yoshli sobiq o‘quvchi ta’lim muassasasiga hujum qilgan, natijada 17 kishi halok bo‘lgandi.
Shundan so‘ng Florida bu kabi hodisalarning oldini olishga qaratilgan qonun loyihasini ma’qullagan. Hujum uchun mo‘ljallangan qurollarni sotib oluvchilar uchun yosh chegarasi avvalgidek 18 emas, 21 qilib belgilangan hamda yarim avtomatik qurollarning otish tezligini oshiruvchi moslamalarni sotish ham taqiqlangan.
Qonun loyihasida, shuningdek, maktablarda soqchilar sonini ko‘paytirish va ba’zi o‘qituvchilarga qurol olib yurishga ruxsat berish taklif qilingan.
Avvalroq Oq uy Jo Baydenning Guantanamodagi qamoqxonani yopmoqchi ekanligini tasdiqlagan edi. Guantanamo harbiy bazasidagi xalqaro terrorchilar jazoni o‘taydigan qamoqxona AQShning sobiq prezidenti Jorj Bush tomonidan 2001-yildagi 11-sentabr teraktlaridan so‘ng terrorizmda ayblangan jinoyatchilarni jazoga mahkum qilish uchun ochilgan.
Shuningdek, Jo Bayden AQSh qanday vaziyatda harbiy kuchdan foydalanishini ma’lum qilgandi. Prezident oliy bosh qo‘mondon sifatida Amerika xalqi va AQSh ittifoqchilarining hayotiy muhim manfaatlarini himoya qilish uchun kuch ishlatishdan tortinmasligini qayd etgan.
Izoh (0)