Ilon Maskning SpaceX kompaniyasi Inspiration4 tijoriy dasturi doirasida Falcon 9 eltuvchi raketasini to‘liq fuqarolik ekipajidan tashkil topadigan Dragon kosmik kemasi bilan orbitaga uchirishni rejalashtirayotganini ma’lum qildi, deb yozmoqda “Interfaks”.

Foto: Meduza

Parvoz 2021-yil 4-choragidan avval amalga oshirilmaydi. Ekipaj to‘rt kishidan iborat bo‘ladi. Taxminlarga ko‘ra, ular orbitada bir necha kun bo‘ladi va Yer sayyorasini har 90 daqiqada bir aylanib chiqadi.

Xabarga ko‘ra, Amerikaning Shift4 Payments kompaniyasi asoschisi va ijrochi direktori Jared Ayzekman parvozda ishtirok etish uchun allaqachon to‘liq to‘lov qilgan. Shuningdek, u hali tanlanmagan qolgan uch nafar ishtirokchining parvoziga homiylik qiladi. SpaceX qolganlarni tanlash uchun 26 kun muddat belgiladi. Ekipaj tarkibidan joy olish maqsadida tanlovda qatnashmoqchi bo‘lganlar kompaniyaning veb-saytiga murojaat qilishi mumkin.

Jared Ayzekman

Foto: “Fokus”

Ta’kidlanishicha, 37 yoshli Ayzekman bolalikdan kosmosga qattiq ishqiboz. 2008-yilda u “Soyuz” raketasining uchishini tomosha qilish uchun Qozog‘istondagi Boyqo‘ng‘ir kosmodromiga kelgan. Bir necha yil o‘tib, NASA’ning Space Shuttle kosmik kemasining so‘nggi parvozlaridan biriga guvoh bo‘lgan.

1-fevral kuni Ayzekman Inspiration4 missiyasi orqali  Memfis shahridagi St.Jude nomli bolalardagi saraton kasalliklarini o‘rganish va tadqiq qilish bilan shug‘ullanuvchi kasalxona uchun 100 million dollar xayriya mablag‘lari yig‘ishni rejalashtirayotganini e’lon qildi. U shaxsiy mablag‘i hisobidan kasalxonaga yana shuncha miqdorda xayriya qiladi.

Ayzekman SpaceX kompaniyasiga bo‘lg‘usi parvoz uchun qancha pul to‘laganini oshkor qilmadi, ammo xayriyadan kutilayotgan mablag‘ missiya narxidan oshib ketishini ta’kidladi.

Xabarga ko‘ra, Ayzekmen ushbu kasalxona xodimlaridan birini allaqachon missiya a’zosi sifatida tanlab qo‘ygan. Ekipajning uchinchi a’zosi St.Jude’ga xayriya qilganlar orasidan tasodifiy tanlanadi. To‘rtinchi ishtirokchi to‘lovlarni kompleks qayta ishlash va texnologik yechimlar bilan shug‘ullanuvchi Shift4 Payments kompaniyasining xizmatlaridan foydalanadigan kompaniyalardan birining egasi bo‘ladi.

Inspiration4’ning kosmik sayyohlarni orbitaga olib chiqish bo‘yicha boshqa loyihalardan farqi shundaki, sayyohlarga professional astronavtlar hamrohlik qilmaydi.

Missiya ishtirokchilariga Space X’da pullik mashg‘ulotlar olib borilishi va’da qilingan bo‘lib, ular Falcon 9 va Dragon’dan vaznsizlik va mikrogravitatsiya sharoitlarida foydalanishni o‘rganadi. Ular orbital mexanikani o‘rganadi, stressga oid testlardan o‘tadi, shuningdek, favqulodda holatlar bo‘yicha mashg‘ulotlarga qatnaydi. Shu bilan birga, kompaniya parvozning har bir bosqichi diqqat bilan kuzatilishini ta’minlashga va’da bermoqda.

Missiya Kanaveral burnidan uchirilishi kutilmoqda, bir necha kundan keyin esa kema Florida qirg‘oqlari yaqiniga kelib qo‘nadi.