Abu-Dabidagi (BAA) “Jangchilar oroli”da 16-yanvar, shanba kuni UFC on ABC 1 musobaqasi bo‘lib o‘tdi.
Kechaning asosiy jangi Maks Hollouey va Kelvin Kattar o‘rtasida kechdi. Jang Holloueyning katta ustunligi ostida o‘tdi. E’tiborlisi, besh raund davom etgan bellashuvda yakkakurashchilar tik turgan holda jang qildi va birorta ham parterga olish holati kuzatilmadi. Yakunda hakamlar bir ovozdan Maksning g‘alabasini qayd etdi.
Musobaqaning yana bir markaziy jangida Karlos Kondit ochkolar hisobda Mett Braundan ustun keldi. Asosiy karddan o‘rin olgan qolgan uch jang taqdiri birinchi raunddayoq hal bo‘ldi.
Asosiy kardda qayd etilgan natijalar bilan tanishing:
- Maks Hollouey (22-6) ochkolar hisobiga Kelvin Kattarni (22-5) mag‘lubiyatga uchratdi;
- Karlos Kondit (32-13) ochkolar hisobiga Mett Braundan (22-18) ustun keldi;
- Li Jingliang (18-6) birinchi raunddagi nokaut evaziga Santyago Ponzinibbioni (27-4) taslim etdi;
- Alessio di Kiriko (13-5) birinchi raunddayoq Xoakin Baklini (12-4) nokautga uchratdi;
- Punaxel Soriano (7-0) birinchi raunddagi nokaut evaziga Dushko Todorovichni (8-1) mag‘lub etdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)