Namangan viloyati hokimi Shavkatjon Abdurazzoqov Namangan shahridagi yuqori bosimli magistral tarmog‘ida nosozlik kuzatilgan “Paxtaliko‘l” suv uzatish inshootiga borib, mutasaddilar ishtirokida holatni joyida ko‘zdan kechirdi. Bu haqda “Daryo” muxbiri Azizbek Abduvaliyev xabar bermoqda.
Foto: “Daryo”
11-yanvar, dushanba kuni “Paxtaliko‘l” suv uzatish inshootida D-1000 millimetrli yuqori bosimli magistral tarmog‘ida suv quvurining yorilishi sodir bo‘lgan va soat 10:00 dan boshlab inshootning faoliyati vaqtinchalik to‘xatilgandi.
Buning oqibatida Namangan shahrining Oromgoh dahasi, “1-Axsikent”, “2-Axsikent”, “Go‘zal”, “Chamanzor”, “Minchinor”, “Mustaqillik”, “Pahlavon”, “Nurobod”, “Sihatgoh”, “Mehnatobod”, “Ishonch”, “Istiqbol” MFY hududi va 1-kichik tumani ayrim joylarida ichimlik suvi ta’minotida vaqtinchalik uzilishlar sodir bo‘lgan.
Foto: “Daryo”
Hozirda “Namangan suv ta’minoti” MChJ mutaxassislari tomonidan tezkorlik bilan nosozlikni bartaraf etish hamda “Oromgoh” suv inshooti orqali ta’minot to‘xtatilgan hududlarga ichimlik suvi yetkazib berish choralari ko‘rilmoqda.
Mutasaddilar “Paxtaliko‘l” suv uzatish inshootidagi nosozlik 4 soat ichida, ya’ni soat 18:00 ga qadar bartaraf etilishini bildirmoqda.
Avvalroq Namangan shahridagi “Paxtaliko‘l” suv uzatish inshootida D-1000 millimetrli yuqori bosimli magistral tarmoqlarda favqulodda nosozlik sodir bo‘lganligi sababli mazkur inshoot faoliyati soat 10:00 dan boshlab vaqtinchalik to‘xtatilgani xabar berilgandi.
Shunigdek, Andijon shahriga ichimlik suvi yetkazib beruvchi Xonobod—Andijon markaziy suv quvurining Andijon tumani “Xortum” mahallasida joylashgan suv taqsimlash jihozida nosozlik yuzaga kelgani sababli 11—12-yanvar kunlari aholiga suv yetkazib berishda uzilish yuzaga kelishi mumkinligi xabar berilgandi. Shu munosabat bilan “Andijon suv ta’minoti” kompaniyasi shahar aholisini ichimlik suvi zaxirasini yaratib olishga chaqirgandi.
Undan avval esa Qashqadaryoda elektr uzilishlari sababli suv ta’minoti to‘xtagandi.
