O‘zbekistonda 25—30-dekabr kunlari “Vaqf” fondi tomonidan xayriya tadbirlari va qurbonliklar o‘tkaziladi
O‘zbekistonda aholining kam ta’minlangan, yordamga muhtoj qatlamini moddiy qo‘llab-quvvatlash maqsadida “Vaqf” xayriya jamoat fondi tomonidan xayriya tadbirlari o‘tkazilishi rejalashtirilgan. Bu haqda “Daryo”ga fond tomonidan ma’lum qilindi.
Xayriya tadbirlari 2020-yil 25—30-dekabr kunlari (6 kun) Qoraqalpog‘iston Respublikasi, viloyatlar va Toshkent shahrining barcha tuman va shaharlarida o‘tkaziladi.
Respublikaning 360 ta ziyoratgoh va qadamjolarida O‘zbekiston musulmonlari idorasi rahbariyati, ulamolar, tuman va shahar bosh imom-xatiblari ishtirokida qurbonlik marosimlari tashkil etiladi. Qurbonlik so‘ngida Qur’oni karim tilovat qilinadi hamda mamlakatning tinchliligi, osoyishtaligi va taraqqiyoti, turli balo va ofatlardan omonda bo‘lishini so‘rab duolar qilinadi.
Respublikaning barcha 2079 ta masjidida 6 kun davomida xufton namozidan keyin jami 12 480 ta Qur’oni karim xatmi amalga oshiriladi.
“Sirdaryo va Buxoro viloyatlaridagi ziyoratgohlarda ham Qur’oni karimning xatmi ado etilib, ofatdan zarar ko‘rgan vatandoshlarimiz haqqiga ezgu duolar qilinadi”, — deyiladi fond xabarida.
Shuningdek, xayriya tadbirlari yakunida qadimiy an’anaga muvofiq Imom Buxoriyning “Sahihi Buxoriy” kitobi iqtidorli imomlar tomonidan xatm qilinadi. Ushbu marosimning yakuni O‘zbekiston musulmonlari idorasi raisi, muftiy Usmonxon Alimov tomonidan Samarqanddagi Imom Buxoriy majmuasida amalga oshiriladi.
“Ulamolar, imom-xatiblar Qur’oni karim va ‘Sahihi Buxoriy’ kitoblarining xatmi yakunida yurtimizga tinchlik, xotirjamlik, xonadonlarimizga qut-baraka, mamlakatimizning yanada taraqqiy etishini so‘rab duo va iltijolar qiladilar”, — deyiladi xabarda.
“Vaqf” fondi tomonidan har bir mahallada muhtoj oilalarga oziq-ovqat mahsulotlari to‘plami tarqatiladi. Imom-xatiblar “Vaqf” fondining hududiy vakillari bilan hamkorlikda muhtoj xonadonlarga kirib, xayriyani tarqatadi. Joylardagi “Mehribonlik”, “Saxovat” va “Muruvvat” uylarida osh dasturxonlari tashkil etilib, maishiy texnika vositalari tarqatiladi.
