O‘zbekistonda noyabr oyida uy-joy kommunal xizmat ko‘rsatish sohasi bo‘yicha shikoyatlar 5 barobar ko‘paydi

2020-yilning noyabr oyida o‘zbekistonliklarning uy-joy kommunal xizmat ko‘rsatish sohasi bo‘yicha shikoyatlari 5 barobar ko‘paygan, deb xabar beradi Iste’molchilar huquqlarini himoya qilish agentligi axborot xizmati.

Ma’lum qilinishicha, Iste’molchilar huquqlarini himoya qilish agentligiga 2020-yilning noyabr oyida respublika bo‘yicha 4693 ta murojaat kelib tushgan. Bu raqam 2019-yilning shu davri bilan taqqoslansa, ariza va shikoyatlar soni 2,5 baravarga ko‘paygani ma’lum bo‘ladi (sentabr — 1787 ta, oktabr — 1929 ta).

Uy-joy kommunal xizmat ko‘rsatish sohasidagi holatlar bo‘yicha aniqlangan murojaatlarning soni 3544 ta, odatdagidan 5 marotaba ko‘p (sentabr — 1767 ta, oktabr — 792 ta).

Ta’kidlanishicha, iste’molchilar murojaatlarining asosiy qismi ko‘p qavatli uylarning elektr energiyasi ta’minoti, gaz va isitish tizimlari bilan bog‘liq. Iste’molchilar huquqlarini himoya qilish agentligining 1159 ishonch telefoni, veb-sayti va elektron pochtasi orqali kuniga 600 ga yaqin so‘rovlar qabul qilingan. 23 va 24-noyabr kunlari esa rekord miqdordagi murojaatlar soni qayd etilgan.

“Fuqarolarning murojaatlari hudud kesimida olinadigan bo‘lsa, 1-o‘rin Toshkent shahri, so‘ngra Farg‘ona va Toshkent viloyatlariga to‘g‘ri keladi. To‘rtinchi o‘rinda Namangan viloyati turibdi”, — deyiladi xabarda.

Avvalroq O‘zbekistonda o‘tgan 10 oyda rejadagidan 5 foizga ko‘p elektr energiyasi ishlab chiqarilgani ma’lum qilingandi.