Samsung’ning yangi hamyonbop smartfoniga oid ma’lumotlar paydo bo‘ldi. Galaxy A02’ga katta sig‘imli akkumulyator o‘rnatiladi

Samsung kompaniyasining hamyonbop Galaxy A02 modeli o‘zining ajoyib texnik tavsifi bilan ko‘pchilikka ma’qul kelmoqda, deb yozadi IXBT. Avvalroq unga sig‘imi 3500 mA/soatga teng akkumulyator o‘rnatilishi haqida gap-so‘zlar tarqalgan edi, biroq sertifikat hujjatida yozilishicha, smartfonga 5000 mA/soatli batareya o‘rnatiladi.

Shuningdek, benchmarklarda Galaxy A02 smartfoni Snapdragon 450 protsessori va 3 gigabayt tezkor xotiraga ega bo‘lishi haqida ma’lumot berilgan va natijada qiziqarli hamyonbop smartfon yuzaga kelgan.

Shu bilan birga, uning quvvati 15 vattni tashkil etadi, ya’ni bu borada smartfon o‘z nomiga munosib bo‘ladi. Qolgan ma’lumotlarga kelinadigan bo‘lsa, apparatga 5,7 dyuymli displey va 13 megapikselli kamera o‘rnatiladi. Ammo hozircha ushbu ma’lumotlar tasdiqlanmagan.

Avvalroq Samsung flagmanlarga xos texnik jihatlarga ega Galaxy S20 FE modelini taqdim etgani, shuningdek, internetda Samsung Galaxy S21’ning ilk sifatli suratlari paydo bo‘lgani to‘g‘risida xabar berilgandi.